റെറ്റിനോപതി - റെറ്റിനയില്‍ പതിഞ്ഞത്‌

കോവിലകം കടവും ചില സീനുകളും!

2011-04-28T18:38:00.000+04:00

( 2001-ല്‍ എന്റെ ക്യാമറ ഒപ്പിയെടുത്തത്)

നിലമ്പൂര്‍ കോവിലകം കടവ്‌ . ചരിത്ര സ്മരണകള്‍ ഉറങ്ങിക്കിടക്കുന്ന ഇവിടം ഒരുപിടി സിനിമകളില്‍ വന്നിട്ടുണ്ട്. 'കുട്ടികുപ്പായം' സിനിമയിലെ 'വെളുക്കുമ്പം കുളിക്കുവാന്‍ പോകുന്ന വഴിവക്കില്‍ വേലിയ്ക്കല്‍ നിന്നവനേ' എന്ന ഗാനരംഗം, 'എന്നെന്നും കണ്ണേട്ടന്റെ' എന്നതിലെ 'പൂവട്ടക തട്ടിചിന്തി പൂമലയില്‍ പുതുമഴ മിന്നി ഗാനരംഗം', ഹരിഹരന്‍ സിനിമകള്‍ എന്നിവയിലൊക്കെ ഈ തീരം ഒപ്പിയെടുക്കപ്പെട്ടു.

മാനവേദന്‍ ഹൈസ്കൂളിലെ സ്റ്റേജ്. യുവജനോല്‍സവം ഉണ്ടാവുമ്പോള്‍ ഒരു വേള ആ സ്റ്റേജില്‍ ഒന്ന് കയറാന്‍ ആഗ്രഹിച്ച നാളുകള്‍ .. മിക്കപ്പോഴും ചിത്രരചനാ മത്സരഫലം വരുമ്പോള്‍ സ്വന്തം പേര്‍ കേട്ട് പുളകിതനായി ആള്‍ക്കൂട്ടത്തില്‍ ആരോരുമറിയാതെ നിന്നതും ഓര്‍ത്തുപോകുന്നു.

സംഭവബഹുലമായ പത്താം ക്ലാസ്‌ പഠനകാലം കഴിഞ്ഞുകൂടിയത് ദേ ആ കാണുന്ന അങ്ങേയറ്റത്തെ ക്ലാസ്‌ മുറിയില്‍ ആയിരുന്നു.

മാതാപിതാക്കളും അമ്മാവനും പഠിച്ച പള്ളിക്കൂടം കാണുവാന്‍ ഒടുവില്‍ പുതുതലമുറയും വന്നെത്തി. എന്‍റെ ഇരട്ടഅനിയത്തിമാരുടെ മക്കള്‍ ഓടിക്കളിക്കുന്നു.

"കൊണ്ടതും കൊടുത്തതും"

2011-01-11T02:38:00.000+04:00

Short Film

തിരക്കഥ & സംഭാഷണം: സാലിഹ് കല്ലട

കഥ & സംവിധാനം : ഷജീര്‍ മണക്കാട്‌

ക്യാമറ & മ്യൂസിക്‌ : കാദര്‍ ഡിംബ്രൈറ്റ്‌

എഡിറ്റിംഗ് : ഫാസില്‍

അഭിനയിച്ചവര്‍ :

ഷജീര്‍ മണക്കാട്,

ഹരി അഭിനയ,

സാലിഹ് കല്ലട,

മന്‍സൂര്‍ ,

സമീര്‍ ,

മായിന്‍ ,

അനില്‍ കുമ്പനാട്

ബാനര്‍ :

ടീം 5 കമ്മ്യൂനിക്കേഷന്‍സ്

സ്റ്റുഡിയോ :

ഒലീവ്‌ മീഡിയ, അബുദാബി

നാടും വീടും വിട്ട്..

2010-12-11T20:56:00.001+04:00

ഒരിക്കലും മറക്കാനാവാത്ത സ്മരണകളുമായി

നാട്ടീന്നും വിട്ടു ഞാന്‍

വീണ്ടും മണലാരണ്യത്തിലെ

എന്‍റെ കൊച്ചുമുറിയില്‍ ഇന്നെത്തി;

അടുത്ത അവധിക്കാലം കാത്തുകൊണ്ട്...

(നാട്ടിലെ പച്ചപ്പ്‌ കാണും ജാലക കാഴ്ചകള്‍ )

ത്രീ ജീനിയസ്സ് സഹോദരങ്ങള്‍

2010-11-17T18:30:00.003+04:00

ത്രീ ജീനിയസ്സ് സഹോദരങ്ങള്‍ക്ക്‌ 2002 സെപ്റ്റംബര്‍ തൊട്ട് 2010 നവംബര്‍ വരെ ഉള്ള ഗ്യാപ്പില്‍ രൂപത്തിന് വന്ന വലിയ മാറ്റം കാണുവിന്‍ നാട്ടാരേ..

പടച്ച തമ്പുരാന്‍ ഇനിയും ഇതേ പോസില്‍ ഒരു പടം നാല്‍പത്‌ വര്‍ഷങ്ങള്‍ക്ക് ശേഷവും എടുക്കുവാന്‍ ഉള്ള അവസരം നല്‍കട്ടെ എന്ന അത്യാഗ്രഹത്തോടെ....

എന്റെ വലതന്‍ : ഏട്ടന്‍ സലീല്‍ (എഞ്ചിനീയര്‍ )
നടുക്കടലില്‍ : ഏറനാടന്‍ (ഇഞ്ചിനീര് )
എന്‍റെ ഇടതന്‍ : അനിയന്‍ സാദിഖ്‌ (പ്രോഗ്രാമര്‍ )

ഞങ്ങളും ജീവിച്ചിരുന്നു.

2010-09-22T00:42:00.002+04:00

ഞങ്ങള്‍ക്ക്‌ അന്ന് നിങ്ങളെപ്പോലെ

മജ്ജയും മാംസവും മനസ്സും

ഉണ്ടായിരുന്നു.

പടച്ചവന്‍ തിരികെ വിളിച്ചപ്പോള്‍

അവ മണ്ണില്‍ ഉപേക്ഷിച്ച്

പോവേണ്ടി വന്നു.

ഞങ്ങള്‍ ഭൂമിയില്‍

ജീവിച്ചിരുന്നു എന്നതിന്

തെളിവിനായ്‌

നിങ്ങള്‍ക്കായ്‌

ഞങ്ങളുടെ ചട്ടക്കൂട് മാത്രം

ബാക്കിവെച്ചു.

നിങ്ങളത്‌ കാഴ്ചക്കായ്‌

എടുത്തും വെച്ചു.

ഓര്‍ക്കുക നിങ്ങളും

ഒരു നാള്‍ പോവേണ്ടി വരും.

അബുദാബിയിലെ ഇഫ്താര്‍ വിരുന്ന്‍ വിശേഷം.

2010-09-05T01:49:00.000+04:00

അബുദാബി ഷേക്ക്‌ സായിദ്‌ പള്ളിയില്‍ ഇപ്രാവശ്യം അഞ്ചര ലക്ഷം ആളുകള്‍ നോമ്പുതുറ സല്‍ക്കാരത്തില്‍ പങ്കെടുത്തു. സ്ത്രീകള്‍ക്കും കുട്ടികള്‍ക്കും പ്രത്യേക ടെന്റുകള്‍ ഒരുക്കിയിട്ടുണ്ട്. ജാതി മതം നോക്കാതെ സര്‍വരെയും സ്വീകരിച്ച് ഇരുത്തി ഭക്ഷണം തരുവാന്‍ അഞ്ഞൂറോളം വളണ്ടിയര്‍മാര്‍ ഉണ്ടായിരുന്നു. ആര്‍മി വകുപ്പ്‌ ആണ് ഭക്ഷണം തയ്യാറാക്കി വിതരണം ചെയ്യുന്നത്. (ചിക്കന്‍, മട്ടന്‍, ഒട്ടകം ബിരിയാണി, ജ്യൂസ്, പഴവര്‍ഗങ്ങള്‍, ഈത്തപ്പഴം, സലാഡ്‌ എന്നിവയുടെ വലിയ കിറ്റ്‌ ഓരോരുത്തര്‍ക്കും)

നാല്പതോളം രാജ്യങ്ങളിലെ നാലായിരത്തി ഇരുന്നോറോളം തൊഴിലാളികള്‍ അധ്വാനിച്ച് പടുത്തുയര്‍ത്തിയ ഷേക്ക്‌ സായിദ്‌ പള്ളി ജാതിമതഭേതമെന്യേ ലോകര്‍ സന്ദര്‍ശിച്ച് പോരുന്നു. മനോഹരമായ നിര്‍മ്മിതി ആരെയും അവിടെ പിടിച്ച് നിറുത്തും. യു ഏ ഇയുടെ ശില്പി എന്നറിയപ്പെടുന്ന ഷേക്ക്‌ സായിദിന്റെ മഖ്ബറ (അന്ത്യവിശ്രമ കുടീരം) ഇവിടെയാണ്‌.

ആയിരങ്ങളായ അനോണികള്‍ക്ക്‌ ഇടയില്‍ ആരോരുമറിയാതെ ഏറനാടനും അനുജനും ഇരിക്കുന്നു.

സിനിമ മനുഷ്യവിരുദ്ധമായ കാര്യങ്ങള്‍ നടക്കുന്ന വേദി.

2010-08-15T16:27:00.000+04:00

സിനിമയുടെ പിന്നാമ്പുറ കഥകള്‍ പലപ്പോഴും പോളിഷ് ചെയ്താണ് മുന്നിലെത്തുന്നതെന്നും എന്നാല്‍, കലകളില്‍ ഇത്രയേറെ മനുഷ്യവിരുദ്ധമായ കാര്യങ്ങള്‍ നടക്കുന്ന മറ്റൊരു വേദി ഇല്ലെന്നും ചെറുകഥാകൃത്ത് ശിഹാബുദ്ധീന്‍ പൊയ്ത്തുംകടവ് അഭിപ്രായപ്പെട്ടു. ഏറനാടന്‍ എന്ന പേരില്‍ ബ്ലോഗ്‌ രചന നടത്തുന്ന സാലിഹ് കല്ലടയുടെ 'ഒരു സിനിമാ ഡയറിക്കുറിപ്പ്' എന്ന പുസ്തകം കേരള ഭാഷാ ഇന്‍സ്റിറ്റ്യൂട്ട് എഡിറ്റര്‍ ഡോ. അസീസ്‌ തരുവണയ്ക്ക് നല്‍കി പ്രകാശനം നിര്‍വഹിച്ച് സംസാരിക്കുക ആയിരുന്നു അദ്ദേഹം. ഇന്നും ചാതുര്‍വര്‍ണ്യം നിലനില്‍ക്കുന്ന സ്ഥലമാണ് സിനിമയുടെ പിന്നാമ്പുറം. അവിടെ ഭക്ഷണം പോലും നാല് തരത്തിലാണ് പാചകം ചെയ്യുന്നതെന്നും ശിഹാബ്‌ കൂട്ടിച്ചേര്‍ത്തു.

ബ്ലോഗ്‌ ലോകതലത്തില്‍ ഏറെ ശ്രദ്ധിക്കപ്പെടുന്ന സാഹിത്യരൂപമാണെന്നും ഗള്‍ഫ്‌ ജീവിതം ഇന്ന് ഏറ്റവും കൂടുതല്‍ ആവിഷ്കരിക്കപ്പെട്ടുകൊണ്ടിരിക്കുന്നത് ബ്ലോഗിലൂടെ ആണെന്നും ഡോ. അസീസ്‌ തരുവണ അഭിപ്രായപ്പെട്ടു. ബ്ലോഗ്‌ സാഹിത്യത്തിലെ പുതിയൊരു ധാരയാണ്. മലയാള സാഹിത്യ ചരിത്രത്തെ കുറിച്ച് കേരള ഭാഷാ ഇന്‍സ്റിറ്റ്യൂട്ട് ഒരു ഗ്രന്ഥം തയ്യാറാക്കുന്നുണ്ടെന്നും അതില്‍ ബ്ലോഗ്‌ സാഹിത്യത്തെക്കുറിച്ച് ഒരു അദ്ധ്യായം ഉള്‍പ്പെടുത്തുമെന്നും അസീസ്‌ തരുവണ പറഞ്ഞു. ഇറാഖ്‌ യുദ്ധകാലത്ത്‌ പ്രമുഖ പത്രപ്രവര്‍ത്തകനായ സലാം ബക്സ് ബ്ലോഗിലൂടെയും ലബനോന്‍ യുദ്ധകാലത്ത് മറ്റൊരു ബ്ലോഗറായ ഒരു പെണ്‍കുട്ടിയുടെ ഡയറിക്കുറിപ്പുകളിലൂടെയും ആയിരുന്നു വാര്‍ത്തകള്‍ സത്യസന്ധമായി ലഭിച്ചുകൊണ്ടിരുന്നത് എന്നും അദ്ദേഹം സൂചിപ്പിച്ചു.

സഫറുള്ള പാലപ്പെട്ടി പുസ്തകം സദസ്സിനു പരിചയപ്പെടുത്തി. കേരള സോഷ്യല്‍ സെന്റര്‍ സെക്രട്ടറി ബക്കര്‍ കണ്ണപുരത്തിന്റെ അധ്യക്ഷതയില്‍ ചേര്‍ന്ന ചടങ്ങില്‍ കെ.എം. അബ്ബാസ്‌ സംസാരിച്ചു. സാഹിത്യ വിഭാഗം സെക്രട്ടറി അയൂബ് കടല്‍മാട്‌ സ്വാഗതവും ജോ.സെക്രട്ടറി എ.എല്‍.സിയാദ്‌ നന്ദിയും പറഞ്ഞു.

ബ്ലോഗ്‌ രംഗത്തെ പ്രമുഖരായ കൈതമുള്ള്, ചന്ദ്രകാന്തം, ബിന്ദു കെ.പി എന്നിവര്‍ കുടുംബസമേതവും, എരകപ്പുല്ല്, എടക്കാടന്‍, വഴിപോക്കന്‍, ഇസ്കന്ദര്‍ മിര്‍സ എന്നിവരും സന്നിഹിതരായിരുന്നു.

പ്രകാശിതപൂരിതം.

2010-08-11T06:59:00.001+04:00

(സിറാജ് പത്രത്തില്‍ വന്നത്)

'ഒരു സിനിമാ ഡയറിക്കുറിപ്പ്' ശ്രീ. ശിഹാബുദ്ദീന്‍ പൊയ്ത്തുംകടവ് Dr. അസീസ്‌ തരുവണക്ക് നല്‍കി പ്രകാശനം ചെയ്തപ്പോള്‍. സമീപം (ഇടത്ത് നിന്ന്) കെ.എസ്.സി. ജ.സെക്ര. ബക്കര്‍ കണ്ണപുരം, സിറാജ് പത്രാധിപര്‍ കെ.എം.അബ്ബാസ്‌, അങ്ങേയറ്റം മാധ്യമം റിപ്പോര്‍ട്ടര്‍ സഫറുള്ള പാലപ്പെട്ടി.

കെ.എസ്.സി. ചുമര്‍ മാസികയായ 'ജാലകം' പ്രകാശനം ചെയ്ത Dr. അസീസ്‌ തരുവണയുടെ (കേരള ഭാഷാ ഇന്‍സ്റിറ്റ്യൂട്ട് എഡിറ്റര്‍) ഒപ്പം നില്‍ക്കുന്നത്‌ ബ്ലോഗര്‍ കൈതമുള്ള്, മാധ്യമം റിപ്പോര്‍ട്ടര്‍ സഫറുള്ള പാലപ്പെട്ടി, കെ.എസ്.സി. സാഹിത്യ വിഭാഗം സെക്ര. അയൂബ് കടല്‍മാട്‌, കവി അസ്മോ പുത്തന്‍ചിറ, പേരറിയാ 'അനോണി'!

(സന്നിഹിതരായിരുന്ന മറ്റ് പ്രമുഖ ബ്ലോഗ്‌ പുലികളായ വഴിപോക്കന്‍, എരകപ്പുല്ല്, എടക്കാടന്‍, ഇസ്കന്ദര്‍ മിര്‍സ, ബിന്ദു കെ.പി, ചന്ദ്രകാന്തം ഫാമിലി എന്നിവര്‍ ക്യാമറയുടെ പിറകില്‍ നില്പുണ്ടായിരുന്നു.)

അവരുടെ പടങ്ങള്‍ ഉടനിടാം..

ഏകദിന സാഹിത്യ ശില്‍പശാല

2010-07-23T22:51:00.000+04:00

ഏകദിന സാഹിത്യ ശില്‍പശാല

2010-07-11T18:07:00.001+04:00

അബുദാബി: കേരള സോഷ്യല്‍ സെന്‍റര്‍ സാഹിത്യ വിഭാഗത്തിന്റെ ആഭിമുഖ്യത്തില്‍ ആഗസ്റ്റ്‌ ആറിന് ഏകദിന സാഹിത്യ ശില്‍പശാല സംഘടിപ്പിക്കുന്നു. കേരള ഭാഷാ ഇന്‍സ്റ്റിട്യൂട്ടിലെ ഡോ. അസീസ്‌ തരുവണ, കേരള സാഹിത്യ അക്കാഡമി അവാര്‍ഡ്‌ ജേതാക്കളായ ബെന്യാമിന്‍, ശിഹാബുദ്ധീന്‍ പൊയ്ത്തുംകടവ്‌, കേരള ശാസ്ത്ര സാഹിത്യ പരിഷത്ത്‌ ഏറണാകുളം ജില്ലാ കമ്മിറ്റി അംഗം ടി.ആര്‍. സുകുമാരന്‍, ബാലസംഘം മുന്‍ സംസ്ഥാന കമ്മിറ്റി അംഗം കെ.വി. ഗണേഷ്‌ എന്നിവര്‍ നയിക്കുന്ന ശില്പശാലയില്‍ നോവല്‍, കഥ, കവിത എന്നീ സാഹിത്യ ശാഖകള്‍ ചര്‍ച്ച ചെയ്യപ്പെടും.

ശില്‍പശാലയില്‍ ഉരുത്തിരിയുന്ന സൃഷ്‌ടികള്‍ സെന്‍റര്‍ മുഖപ്രസിദ്ധീകരണമായ 'പ്രവാസി'യില്‍ പ്രസിദ്ധീകരിക്കും. യു.ഏ.ഇയിലെ നിരവധി എഴുത്തുകാര്‍ സംബന്ധിക്കുന്ന ശില്‍പശാലയില്‍ പങ്കെടുക്കുവാന്‍ താല്‍പര്യമുള്ളവര്‍ 02 6314455 / 050 6999783 / 055 6999783 എന്നീ നമ്പരുകളില്‍ ബന്ധപ്പെടണമെന്ന് കേരള സോഷ്യല്‍ സെന്റര്‍ സാഹിത്യ വിഭാഗം സെക്രട്ടറി അയൂബ് കടല്‍മാട്‌ അറിയിച്ചു.

അന്നേദിവസം എന്റെ പ്രഥമ പുസ്തകം "ഒരു സിനിമാ ഡയറിക്കുറിപ്പ്" പ്രകാശനവും ഉണ്ടായിരിക്കുന്നതാണ്. ഈ മഹനീയ മുഹൂര്‍ത്തത്തിലേക്ക്‌ ഏവരെയും സഹര്‍ഷം സ്വാഗതം ചെയ്യുന്നു. നേരില്‍ കാണാമെന്ന ശുഭപ്രതീക്ഷയോടെ..

സ്നേഹപൂര്‍വ്വം,

മാതൃഭൂമി പത്രത്തില്‍..

2010-07-06T01:00:00.000+04:00

മല്‍സര ചിത്രം.

2010-07-01T23:59:00.003+04:00

മൂന്ന്‍ പ്രസിദ്ധ ബൂലോകര്‍ പ്രവര്‍ത്തിക്കുന്ന പുതിയ ടെലിഫിലിം ഒരാഴ്ച കൊണ്ട് ഷൂട്ടും എഡിറ്റിംഗും ഡബ്ബിംഗും പൂര്‍ത്തിയാക്കി. (മല്‍സര ചിത്രം ആയതിനാല്‍ തല്‍ക്കാലം പേരും കഥയും രഹസ്യമാക്കാന്‍ ഞങ്ങള്‍ നിര്‍ബന്ധിതരായിരിക്കുകയാണ്.)

ഫോട്ടോയില്‍ വലത്തു നിന്നും
ചിത്രസംയോജകന്‍ മുജീബ്‌ കുമരനെല്ലൂര്‍,
നായകന്‍ ഏറനാടന്‍,
നിര്‍മ്മാതാവ് ഷെരീഫ്‌ മാന്നാര്‍,
നായിക അനന്തലക്ഷ്മി ഷെരീഫ്‌,
സഹസംവിധായിക അച്ചു പതിക്കല്‍,
രചന-സംവിധായകന്‍ ഇസ്കന്തര്‍ മിര്‍സ,
ക്യാമറാമാന്‍+വില്ലന്‍ ഹനീഫ്‌ കുമരനെല്ലൂര്‍,
മാസ്റ്റര്‍ ആസാദ്‌ അപ്പു.

അബുദാബി മലയാളി സമാജം ഹ്രസ്വചിത്ര മല്‍സരത്തില്‍ പൊതുജനങ്ങള്‍ക്ക്‌ മുന്നില്‍ ഇത് പ്രദര്‍ശിപ്പിക്കുന്നു. ഈ മാസം പതിനഞ്ചിനായിരിക്കും.

പ്രോത്സാഹനങ്ങളും പ്രാര്‍ത്ഥനകളും ഉണ്ടാവുമല്ലോ..

ഒരു ക്ലിക്ക്‌!

2010-06-29T01:13:00.000+04:00

നായകനും വില്ലനും സംവിധായകനും ഒരു ക്ലിക്കില്‍ പെട്ടപ്പോള്‍!

അങ്ങേ അറ്റം ചിരിച്ചു നില്‍ക്കുന്നത്‌ തുമ്പോളി കടപ്പുറത്ത്‌ സില്‍ക്ക്‌ സ്മിതയെ മുതല്‍ കളിയാട്ടത്തില്‍ മഞ്ജു വാരിയരെ വരെ ഡയലോഗ് പ്രോമ്റ്റ്‌ ചെയ്ത അന്നത്തെ സഹസംവിധായകന്‍ ഇസ്കന്തര്‍ മിര്‍സ.

(പുതുമുഖമായ ഒരു ബ്ലോഗനാണ്)

താടിക്കാരന്‍ - മലയാളസിനിമയില്‍ ശ്രദ്ധിക്കപ്പെട്ടു വരുന്ന കോമഡി വില്ലന്‍ ഹനീഫ്‌ കുമരനെല്ലൂര്‍, അമിതാഭ് ബച്ചനും മോഹന്‍ ലാലും ഹനീഫിനോപ്പം മേജര്‍ രവിയുടെ 'കാണ്ടഹാര്‍' എന്ന സിനിമയില്‍ അഭിനയിക്കുന്നു. :)

ഇങ്ങേ അറ്റം: ഉമ്മര്‍ ഭായ്‌ - കാമറ സഹായി.

ഇസ്കന്തര്‍ മിര്‍സ രചിച്ച് സംവിധാനിക്കുന്ന പുതിയ ടെലിഫിലിമില്‍ നായകനായ ഒരു ബ്ലോഗനൊപ്പം ഇവര്‍ ക്ലിക്കില്‍ പെട്ടപ്പോള്‍..!

എത്തിസലാത്ത്‌ പരസ്യത്തില്‍ എത്തി!!

2010-04-04T20:46:00.001+04:00

എത്തിസലാത്ത്‌ വാര്‍ഷിക റിപ്പോര്‍ട്ട്-2009-ല്‍ എത്തി!

പേജ് 20 & 31 താളുകളില്‍ കമ്പനിക്ക്‌ കണ്ണേര്‍ തട്ടാതിരിക്കാന്‍
കറുപ്പന്‍ ആയ ഒരു ഏറനാടന്‍
കോലം കെട്ടി പടം ആക്കപ്പെട്ടു കിടക്കുന്നു!! ദേ ഇങ്ങിനെ ഇതുമാതിരി...=

റ്റോംസ് എന്ന കടുവയെ പിടിച്ച കിടുവ!

2010-02-21T20:12:00.001+04:00

ലോകപ്രശസ്ത മലയാളീ കാര്‍ട്ടൂണിസ്റ്റ് റ്റോംസ് തന്നേക്കാളും പ്രശസ്ത-സൃഷ്ടികളായ ‘ബോബനും മോളിയും’ പരമ്പരയുടെ അന്‍പതാം വാര്‍ഷികത്തിന് ഈയ്യിടെ അബുദാബിയിലെത്തിയ നേരം.. പണ്ട് പണ്ട്, പള്ളിക്കൂടത്തില്‍ പോകുന്ന കാലം തൊട്ട് തര്‍ക്കുത്തരത്തിനും ഉരുളയ്ക്ക് ഉപ്പേരിക്കും കുസൃതികള്‍ക്കും പ്രചോദനമായിരുന്ന ബോബനും, മോളിയും, അവരുടെ പട്ടി, പിന്നെ.. മൊട്ട, അപ്പീഹിപ്പി, പ.പ്രസിഡന്റ്, ചേടത്തി, വക്കീല്‍, ഉപ്പായി മാപ്ല ഇവര്‍ക്കൊക്കെ ജന്മം നല്‍കിയ റ്റോംസിനെ നേരില്‍ കാണുവാന്‍ പൂതിയോടെ കഴിഞ്ഞതാണ്. ഒടുവില്‍ ആ മഹാന്‍ പ്രത്യക്ഷപ്പെട്ടപ്പോള്‍ പരിചയപ്പെടുവാന്‍ എനിക്കും അവസരമൊത്തു.

സാക്ഷാല്‍ റ്റോംസിന്റെ കാരിക്കേച്ചര്‍ ചെയ്യുന്ന ഗോമ്പറ്റീഷനില്‍ ഞാനും കൂടി. മറവിയുടെ മാറാലക്കുരുക്കില്‍ കുരുങ്ങിപ്പോയ എന്നിലെ കാര്‍ട്ടൂണ്‍വര വര്‍ഷങ്ങള്‍ക്കു ശേഷം വന്നപ്പോള്‍, പേപ്പറില്‍ റ്റോംസ് പതിഞ്ഞു. ആ വരയെ വിലയിരുത്തിയ മഹാന്‍ കൈയ്യൊപ്പ് ചാര്‍ത്തി തോളില്‍ കൊട്ടിയിട്ട് പറഞ്ഞത് “കടുവയെ പിടിച്ച കിടുവ!!” എന്നത് വലിയൊരു പുരസ്കാരമായി ഞാന്‍ സ്വീകരിച്ചു.

പണ്ട്, ആ വരകളിലൂടെ സഞ്ചരിച്ച എന്റെ ബാല്യകാ‍ലത്ത്, കാര്‍ട്ടൂണ്‍ മത്സരങ്ങളില്‍ പയറ്റിക്കിട്ടിയ സോപ്പ് പെട്ടി, പെന്‍സില്‍, പെന്‍, സാക്ഷ്യപത്രം ഒക്കെ ലഭിക്കുവാനും ഭാഗ്യമുണ്ടായി. നാലാം തരം മുതല്‍ക്ക് തുടങ്ങിയ മത്സരം കാലിക്കറ്റ് സി-സോണിലെ രണ്ടാം സമ്മാനത്തില്‍ ചെന്നെത്തി അവസാനിപ്പിച്ചതാണ്.

ഈ സാധനം ഓര്‍മ്മയുണ്ടോ? ഒന്നോര്‍ത്ത് നോക്ക്യേ??

2010-02-05T19:48:00.002+04:00

ഇങ്ങനെ ഒരു സാധനം കണ്ടതായി ഓര്‍ക്കുന്നുവോ?ഇതില്‍ പണ്ട് കണ്ടിരുന്ന വിവാഹകാസറ്റ്, സിനിമ, മറ്റ് പലവിധ ‘ഷോ’കള്‍.. മറന്നുവോ?

ഇന്നത്തെ കാലത്ത് എത്ര സൈസുള്ളതും മില്യണ്‍ ഡോളര്‍ ചിലവുള്ളതുമായ പുത്തന്‍‌പടങ്ങളും പാട്ടുകളും ഒരു ചെറുവിരല്‍ പോലും സൈസ് ഇല്ലാത്ത ‘കുറ്റി’ (ഫ്ലാഷ് ഡ്രൈവ്)-യിലും ‘പപ്പട വട്ടവാഹിനി’ (ഡിവിഡി/സിഡി)-യിലും കൊണ്ടുനടക്കുന്ന തലമുറയ്ക്ക് ഇവനെ അറിയില്ല. ഇവനാണ് വീസിആര്‍ ഏലിയാസ് വീസീപി പ്ലെയര്‍! ഇരുപത്തഞ്ച് കൊല്ലങ്ങള്‍ക്ക് മുന്‍പ്, ഇത് ഉള്ള വീടുകള്‍തോറും ആഴ്ചയില്‍ ഒരിക്കല്‍ ഒരുത്തന്‍ ഒരു പെട്ടി നിറയെ ഇതിലിട്ട് കാണാനുള്ള ഓലച്ചുരുളടങ്ങിയ കാസറ്റുകളുമായി വരുമായിരുന്നു. (മഞ്ചേരിയില്‍ നിന്നും നിലമ്പൂരിലേക്കാണ് കാസറ്റ് ചെങ്ങാതിയുടെ വരവ്). അന്ന്, അഞ്ചുരൂപ വാടകയ്ക്ക് ഒരു കാസറ്റ് ഒരാഴ്ചയ്ക്ക് കിട്ടും. ജയന്‍, നസീര്‍ മുതല്‍ക്ക് അന്നത്തെ പുതുതാരങ്ങള്‍ ആയി കസറിവന്ന മമ്മൂട്ടി, മോഹന്‍‌ലാല്‍, റഹ്മാന്‍, രോഹിണി, മാധവി സിനിമാ കാസറ്റുകള്‍ക്ക് വന്‍ ഡിമാന്‍സായിരുന്നു. കോളേജ് പിള്ളേരുള്ള വീടുകളില്‍ ഹോളിവുഡ്, ഹിന്ദി, തമിഴ് മസാലകളും ചിലവായിരുന്നു. എന്റെ വീട്ടില്‍ ഇല്ലാത്തതിനാല്‍ അയല്‍‌പക്കത്ത് പോയിട്ട് ഇതില്‍ കളിക്കുന്ന സിനിമകള്‍ കണ്ട് അന്തം വിട്ട് ഇരുന്ന് ഹരം കൊണ്ടതൊക്കെ മറക്കാനാവില്ല. അവിടെ എട്ട് പെണ്‍‌കുട്ടികളായിരുന്നു. അറിഞ്ഞോ അറിയാതെയോ എന്ന് ഇപ്പോഴും എനിക്കറിയില്ല! ഒരിക്കല്‍ ടൂറിംഗ് കാസറ്റ് ചെങ്ങാതി, ഏറ്റവും പുതിയ ഹോളിവുഡ്ഡ് ഹൊറര്‍ പടമാണെന്ന് പറഞ്ഞ് അവരെക്കൊണ്ട് ഒരു കാസറ്റ് എടുപ്പിച്ചു. അവന്‍ പൈസയും വാങ്ങി പോയ ഉടന്‍ എട്ട് പെണ്ണുങ്ങളും വള്ളിനിക്കറിട്ട പൊടിയന്‍ പയ്യനായ ഞാനും ആ കാസറ്റ് പ്ലേയറില്‍ ഇട്ട് പൊട്ടലും ചീറ്റലും വരുന്ന ‘സോണി‘ ബ്രാന്‍ഡ് ടീവിയില്‍ കണ്ണും നട്ടിരുന്നപ്പോള്‍... ഹൊറര്‍ രംഗത്തേക്കാളും ഭീബത്സമായ, തുണിയില്ലാത്ത ഒരു പെണ്ണും രണ്ടാണും കാണിക്കുന്ന വിക്രസ്സ്!! ഞാന്‍ മൂളിപ്പാട്ടും പാടി ഇറങ്ങിയോടി. എട്ട് പെണ്ണുങ്ങളിലാരോ ഓടിപ്പോയിട്ട് മെയിന്‍ സ്വിച്ച് ഓഫാക്കി കാസറ്റോടുന്നത് നിറുത്തലാക്കി. അടുത്തയാഴ്ച കാസറ്റ് ചെങ്ങാതി വരുമ്പോള്‍ വെച്ചിട്ടുണ്ടെന്നൊക്കെ അവര്‍ പറഞ്ഞത് കേട്ടു. എന്നാല്‍, പിന്നീട് വന്നത് വേറെ യുവാവ് ആയിരുന്നു! ഇതൊക്കെ ഇപ്പോള്‍ ഓര്‍മ്മയുടെ അറയില്‍ തെളിഞ്ഞത് ഈയ്യിടെ ഈ പുരാതന സാധനത്തെ പൊടിപിടിച്ച നിലയില്‍ അബുദാബിയിലെ സുഹൃത്തിന്റെ വീട്ടില്‍ കണ്ടപ്പോഴാണ്.

സാമ്പത്തിക മാന്ദ്യകാലത്തെ നേര്‍ക്കാഴ്ചകള്‍!

2010-01-16T19:36:00.000+04:00

സാമ്പത്തിക മാന്ദ്യകാലത്തെ പ്രവാസമണ്ണില്‍ നിന്നും ഒപ്പിയെടുത്ത വ്യത്യസ്ത ഷോട്ടുകള്‍..

പണിയില്ലാത്ത പട്ടാണിയുടെ മീന്‍‌പിടുത്തം. (ഒരു കടലോളം വെള്ളം ഉണ്ടായിട്ടും പുറം തിരിഞ്ഞിരുന്ന് കരയിലെ മീന്‍ പിടിക്കുന്നത് ഒരു പട്ടാണി സ്റ്റൈല്‍!)

ഓട്ടം നിറുത്തിയ ടാക്സി കാറിന്റെ മുകളില്‍ നല്ല മീന്‍ കൂട്ടിയ കാലമോര്‍ത്ത് മയങ്ങുന്ന മെലിഞ്ഞുകൊണ്ടിരിക്കുന്ന ഒരു കാടന്‍‌പൂച്ച!

ദൈനംദിന പണികളില്‍ നിന്നും ‘ഫ്രീ‘ ആയവര്‍ ചാനലുകാരുടെ ഫ്ലാഷ് ന്യൂസ് കണ്ടും കേട്ടും ചുമ്മാ ഇരിക്കുന്നു..

പണ്ട്, നാട്ടിന്‍പുറങ്ങളിലെ വായനശാലകളിലും റിക്രിയേഷന്‍ ക്ലബുകളിലും തൊഴില്‍‌രഹിതരായവര്‍ (ഞാനും അടക്കം) ഇങ്ങനെ ടിവിപ്പെട്ടിക്ക് മുന്നില്‍ ഇരുന്ന കാലം ഇവിടെ പ്രവാസമണ്ണിലും പുനരാവിഷ്കരിക്കപ്പെട്ടപ്പോള്‍ സത്യായിട്ടും അന്ത:രംഗത്തിലാരോ വിസില്‍ ഊതുമ്പോലെ..

ഷാർജായിലെ ഈ ഹാൾ ഏതാണ്?

2010-01-01T21:55:00.000+04:00

ഷാർജയിലെ ടൌൺഹാൾ (ഇതിന്റെ ശരിപ്പേർ മറന്നുപോയി.)

ഷാർജായിലെ ഈ ഹാളിന്റെ പേർ അറിയുമെങ്കിൽ ഒന്ന് അറിയിക്കണമെന്ന് അഭ്യർത്ഥിക്കുന്നു.

2012 - ലോകാവസാനം ബ്രഹ്മാണ്ഠ സിനിമ!!!

2009-11-13T19:53:00.003+04:00

2012 ലോകം ഒടുങ്ങുന്നതിനും മുമ്പെ സിനിമ കാണാന് കോഴിക്കോട് ക്രൌണില് ഓടിക്കൂടിയ ജനം!

ഓടിവരൂ ലോകം ഒടുങ്ങാനുള്ള പോക്കാ..!

ഇത് നരകമല്ല, സിനിമാഹാളാണ്, വെള്ളത്തിരശ്ശീലയില് ആകാംക്ഷയോടെ കണ്ണും നട്ടിരിക്കുന്ന ജനം..

തീര്ന്നൂ മക്കളേ, തീര്ന്നു, സിനിമ തീര്ന്നൂന്ന്! ലോകമല്ല..

പുറം ലോകത്ത് എത്തിയപ്പോള് 2012 കാണാന് ഓടിക്കൂടുന്ന ജനങ്ങളുടെ തിക്കിത്തിരക്ക്! മുകളില് തെളിഞ്ഞ ആകാശം മേഘാവൃതം ആയി.

എന്തൊക്കെ ആയാലും 2012 ഒരു ബ്രഹ്മാണ്ഠ സിനിമ തന്നെ എന്നതിന് നോ ഡൌട്ട്! എനിക്ക് ടൈറ്റാനിക്കിനേക്കാളും ഈ പടം ഇഷ്ടായി.

ലോകം മൊത്തം സുനാമിത്തിരകളും അഗ്നിപര്‌വതങ്ങളും തകര്ത്തിടുകയല്ലേ. അമേരിക്ക പോലും നാമാവശേഷമായി. ഹിമാലയം മാത്രം ബാക്കി. ഇന്ത്യ ആദ്യമേ ഡക്കിന് ഔട്ടായിട്ടോ!!

കണ്ടില്ലെങ്കില് കാണണം, അല്ലെങ്കില് 2012 വരെ കാത്തിരുന്നാല് ലൈവ് ആയി കാണാവുന്നതാണ്!!

വാര്ർത്തകളുടെ നാൾവഴികൾ... An Unusual Collection of BREAKING NEWS

2009-11-01T22:57:00.001+04:00

നമ്മളെ സ്വാധീനിച്ച, നമ്മളെ വേട്ടയാടിയ, നമ്മൾ മറന്നുപോയ വാർത്തകളിലൂടെ ഒരു സഞ്ചാരം ആയിരുന്നു ഇന്നലെ അബുദാബിയിൽ സംഭവിച്ചത്‌.

ചങ്ങരംകുളത്തിനടുത്തുള്ള കടവല്ലൂര് സ്വദേശിയും ഇരുപത്തഞ്ചു വർഷക്കാലമായി പ്രവാസിയുമായ അലിഭായ്‌ എന്നറിയപ്പെടുന്ന അബൂബക്കർ അലിയുടെ വാർത്താശേഖരം കെ.എസ്‌.സി സാഹിത്യവിഭാഗം പ്രദർശനം നടത്തി.

കരാട്ടേയിലും കുബുഡോയിലും 2nd DAN Black Belt നേടിയതും കൂടാതെ കളരിപ്പയറ്റ്, യോഗ എന്നിവയിലും പ്രാവീണ്യം നേടിയിട്ടുള്ള ബഹുമുഖ പ്രതിഭയാണ് അബൂബക്കറലി എന്ന അലിഭായ്..

നാണയശേഖരം, സ്റ്റാമ്പ്‌ ശേഖരം എന്നീ പലവിധ ഹോബികളും നാം കേട്ടിരിക്കാമെങ്കിലും വർഷങ്ങളായി പത്രത്താളുകളിൽ വന്നുമറഞ്ഞിട്ടുള്ള പ്രധാന വാർത്തകൾ, വിശിഷ്‌ടവ്യക്തികളുടെ നിര്യാണങ്ങൾ, വിവാദങ്ങൾ, കുറ്റാന്വേഷണങ്ങൾ, കുറ്റവാളികൾ, കൗതുകവാർത്തകൾ തുടങ്ങിയ നാനാവിധ വിഭാഗങ്ങളിൽ തിരിക്കാവുന്നവ അലിഭായുടെ ശേഖരത്തിലെ മുതൽക്കൂട്ടാവുന്നു. ഇവയുടെ പ്രദമ പ്രദർശനമായിരുന്നു ഇന്നലെത്തേത്‌.

ഇത്രയും കാലം സ്വകാര്യസ്വത്തുപോലെ സൂക്ഷിച്ചുപോന്ന അലിഭായുടെ വാർത്താശേഖരം സഹമുറിയൻ ആയ ഞാൻ സുഹൃത്തുക്കളായ മാമ്മൻ കെ രാജനും അബുദാബി മീഡിയ കമ്പനീലെ ശ്രീനിവാസിനും കാണിച്ചുകൊടുത്തു. ശ്രീനിവാസ്‌ ഏഷ്യാനെറ്റിലെ ഫൈസൽ ബിൻ അഹമദിനെ അറിയിക്കുകയും അങ്ങനെ ഏഷ്യാനെറ്റ്‌ ഗൾഫ്‌ റൗണ്ടപ്പ്‌ പരിപാടിയിൽ അലിഭായുടെ മുഖാമുഖം വരുകയുമുണ്ടായി.

കെ.എസ്‌.സി സാഹിത്യവിഭാഗം സെക്രട്ടറിയായ മാമ്മൻ കെ രാജനാണ്‌ ഈ വാർത്താപ്രദർശനം സംഘടിപ്പിച്ചത്‌, നൂറുകണക്കിനാളുകൾ പ്രദർശനം കാണാനെത്തിയിരുന്നു. യാദൃശ്ചികമെന്നോണം കെ.എസ്‌.സി ജോ.സെക്രട്ടറിയും ന്യൂസ്‌ റിപ്പോർട്ടറുമായ സഫറുള്ള പാലപ്പെട്ടി ഞെട്ടിപ്പോയി!

ഈ വാർത്താശേഖരത്തിൽ നായനാർ അബുദാബി സന്ദർശിച്ച വാർത്ത പണ്ട്‌ അദ്ധേഹം കൊടുത്തത്‌ കൂട്ടത്തിൽ കണ്ടത്‌ മാത്രമല്ല മറിച്ച്‌, ഇതെല്ലാം ശേഖരിച്ചു സൂക്ഷിക്കുന്നത്‌ പണ്ട്‌ ഒരേ മുറിയിൽ താമസിച്ചിരുന്ന സുഹൃത്ത്‌ ആണെന്ന് അറിഞ്ഞപ്പോഴാണ്‌ സഫറുള്ള അക്ഷരാർത്ഥത്തിൽ ഞെട്ടിയത്‌. ഏറെനാളുകൾക്ക്‌ ശേഷം കണ്ടുമുട്ടിയ സഫറുള്ളയും അലിഭായും സൗഹൃദം പൊടിതട്ടിയെടുത്തു.

സിസ്‌റ്റർ അഭയക്കേസ് വാർത്തകൾ

വീരപ്പൻ വാർത്തകൾ

ഷേയ്‌ക്ക് സായിദ് നിര്യാണവാർത്ത

എംജിആർ, എം‌എസ്സ് സുബ്ബലക്ഷ്മി, ബേനസീർ, ഒടുവിലാൻ, മറ്റ് വ്യക്തിനിര്യാണങ്ങൾ

അലിഭായിക്കൊപ്പം ഏറനാടൻ

അലിഭായ് (നടുവിൽ), വലത്തുനിന്നും മൂന്നാമത് മാമ്മൻ കെ രാജൻ, പുതുബ്ലോഗന് സഹവാസി (ഇടത്തുനിന്നും മൂന്നാമത്),സഹമുറിയന്മാരായ ഷെമീർ, നൌഫൽ ഭായിജാൻ, മുജീബ്, പ്രിജീത്

നവബൂലോകന് സഹവാസി പോസ്‌റ്റിനുള്ള വക വല്ലതും തടയുമോ എന്ന് ചികയുന്നു!

ഈ പ്രദർശനത്തോടൊപ്പം തന്നെ വ്യത്യസ്തമായ ഒരു ഡോക്യുഫിക്ഷൻ ഹ്രസ്വചിത്രം പ്രദർശിപ്പിച്ചു. ക്രയോൺ ജയൻ രചന സംവിധാനം നിർവ്വഹിച്ച 'കാലിഡിയോസ്കോപ്പ്‌' ഇന്നത്തെ കേരളത്തിലെ ഭക്തി ക്യ്‌ഊ, ബീവറേജസ്‌ ക്യ്‌ഊ എന്നിവയും ക്വട്ടേഷൻ, പെൺപീഢനം, ലഹരി, ഭ്രാന്ത്‌ എന്നിവയുടെ നേർക്കാഴ്ച ഒപ്പിയെടുത്ത്‌ നിറവൈവിധ്യമുള്ള കാലിഡിയോസ്കോപ്പിക്‌ വ്യ്‌ഊ ഒരുക്കിയത്‌ നന്നായിരിക്കുന്നു. ശബ്‌ദലേഖനം കൂടെ ശ്രദ്ധിച്ചിരുന്നെങ്കില് ഒന്നൂടെ നന്നാക്കാമായിരുന്നു ചിത്രം എന്നു തോന്നിപ്പോയി.

സുഹൃത്തും കുടുംബവും അപകടത്തില്‍ പെട്ടു!

2009-10-11T12:35:00.001+04:00

2009 ദുരന്തങ്ങളുടെ കൊല്ലമാണല്ലോ ദൈവമേ!!

ഇന്ന് കാലത്തുമുതല്‍ നാട്ടിലെ സുഹൃത്ത് നസീറിന്റെ മിസ്സ്ഡ് കാള്‍സ് നിരന്തരം വന്നപ്പോള്‍ മനസ്സില്‍ എന്തോ വല്ലായ്മ അനുഭവപ്പെട്ടു തുടങ്ങി.

തിരിച്ചുവിളിച്ചപ്പോള്‍ അവന്റെ പതിഞ്ഞസ്വരത്തില്‍ ആ വാര്‍ത്ത കാതില്‍ വന്നുപതിച്ചപ്പോള്‍.. എന്റെ കണ്ണുനീര്‍തുള്ളി താഴെപതിച്ചത് നിയന്ത്രിക്കാന്‍ സാധിക്കാതെയായി.

ഹൈസ്ക്കൂള്‍ ക്ലാസ്സ് മുതല്‍ പ്രീഡിഗ്രീ വരെ സഹപാഠിയായിരുന്ന അതിലേറെ ഉറ്റസുഹൃത്തായ സ്നേഹിതയും കുടുംബവും ഇന്നലെ ജിദ്ധയിലെ വാഹനാപകടത്തില്‍ പെട്ടു. അവരുടെ രണ്ട് കുഞ്ഞുങ്ങള്‍ മരണപ്പെട്ടു, സ്നേഹിതയും ഭര്‍ത്താവും ഇപ്പോള്‍ അത്യാസന്നനിലയില്‍ കഴിയുന്നു.

ഉം‌റ കഴിഞ്ഞുവരും വേളയില്‍ പുണ്യനഗരമായ മദീനയില്‍ പോയി വരുന്നവഴിയായിരുന്നു ദുരന്തം.

നിലമ്പൂര്‍ സ്വദേശികളായ സ്നേഹിത ഷക്കീലയുടേയും ഭര്‍ത്താവ് നൌഷാദിനും ആരോഗ്യം വേഗം വീണ്ടുകിട്ടുമാറാകട്ടെ എന്ന് സര്‍‌വേശ്വരനോട് സന്മനസ്സോടെ പ്രാര്‍ത്ഥിക്കുക, ഈശ്വരന് അസാധ്യമായത് ഒന്നുമില്ല എന്ന വിശ്വാസത്തോടെ..

കഴിഞ്ഞ കൊല്ലം നാട്ടില്‍ വന്നപ്പോള്‍ ക്ലാസ്സ്‌മേറ്റ്സ് എല്ലാവരും ഒരു കല്യാണസദസ്സില്‍ വെച്ച് ഒന്നിച്ചിരുന്നു. അബുദാബിയില്‍ ആയ എന്നെ അന്ന് സുഹൃത്തുക്കള്‍ വിളിച്ചകൂട്ടത്തില്‍ യാദൃശ്ചികമായിട്ട് സ്നേഹിത മുഖവുരയില്ലാതെ ഫോണില്‍ വിശേഷങ്ങളൊക്കെ പറഞ്ഞിരുന്നത് മനസ്സില്‍ ഈ വേള ഓര്‍ത്തുപോയി.

ഒരുമിച്ച് പഠിക്കുന്ന കാലത്ത് എന്തോ ഒരു അടുപ്പം എന്റെ അപക്വമനസ്സില്‍ തോന്നിയപ്പോള്‍ “നമുക്ക് എക്കാലവും നല്ല സുഹൃത്തുക്കള്‍ ആയി കഴിഞ്ഞാല്‍ പോരേ?” എന്ന് അവള്‍ തിരുത്തിയതും അതുപോലെത്തന്നെ സുഹൃത്തുക്കളായി കഴിഞ്ഞതും ദൈവനിശ്ചയം!

ദുബായ് മെട്രോട്രെയിനില്‍ ഒരു സവാരി!

2009-09-22T20:45:00.000+04:00

മെട്രോട്രെയിന്‍ യാത്രയുടെ ഒരു വീഡിയോ ഇതാ ഇവിടെ:-

പെരുന്നാള്‍ അവധിദിനത്തില്‍ ഞാന്‍ സഹോദരീ,സഹോദര കുടുംബത്തോടൊപ്പം ദുബായ് മെട്രോ ട്രെയിനില്‍ ഒരു സവാരിക്ക് പോയി. അതൊരു ഒന്നൊന്നര സവാരിയായിരുന്നു.

മാള്‍ ഓഫ് എമിരേറ്റ്സ് പാര്‍ക്കിങ്ങില്‍ വണ്ടിയിട്ട് മെട്രോയില്‍ കേറാന്‍ പോകുമ്പോള്‍ സ്റ്റേഷനില്‍ക്കുള്ള വഴിയെല്ലാം അടച്ചിട്ടിരിക്കുന്നു. നാട്ടിലെപ്പോലെ ഇവിടേം ബന്ദ് ആയൊ എന്ന് അന്ധാളിച്ചപ്പോള്‍ ഒരുത്തന്‍ പറഞ്ഞു മാള്‍ ഓഫ് എമിറേറ്റ്സിലൂടെ അകത്തൂടെ പോകണം സ്റ്റേഷനില്‍ എത്തുവാനെന്ന്.

സ്റ്റേഷനില്‍ക്ക് പോകുമ്പോള്‍ ഷോപ്പിംഗ് നടത്തി പൈസ തുലയ്ക്കാനുള്ള അടവാണ് ഈ സം‌വിധാനമെന്ന് മനസ്സിലായി. ഞമ്മളോടാ കളി! ഒരു മിഠായ് പോലും മേടിക്കാതെ ഞങ്ങള്‍ ഒരുപാട് ദൂരം മാളിനകത്തൂടെ നടന്ന് സ്റ്റേഷനിലേക്കുള്ള ആള്‍ക്കാരുടെ ക്യൂവില്‍ നിന്നു. ഉച്ചതിരിഞ്ഞുള്ള നേരമായതുകൊണ്ട് വലിയ തിരക്കില്ല.

ഏറെനേരം നിന്നപ്പോള്‍ ക്ഷീണത്താല്‍ സഹോദരന്റെ ഭാര്യ കുഴഞ്ഞുവീണു. അതുകണ്ട് ഒരു മദാമ്മ ബാഗില്‍ വെച്ച മിനറല്‍ വാട്ടര്‍ തന്നു. അതും കണ്ട് മെട്രോസ്റ്റാഫ് ഫിലിപ്പിനിയും ഒരു നീഗ്രോയും ഓടിവന്നു സുശ്രൂഷ തരികയും ക്യൂവില്‍ നിന്ന ഞങ്ങളെ പ്രത്യേകം പരിചരിച്ച് വേറെ കവാടത്തിലൂടെ കൊണ്ടുപോകുകയും ഉണ്ടായി. വലിയ ബുദ്ധിമുട്ടില്ലാതെ ഞങ്ങളെ അവര്‍ ട്രെയിന്‍ ടിക്കറ്റുകള്‍ ലഭിക്കുവാനും പ്ലാറ്റ് ഫോമിലേക്ക് എത്തിക്കുവാനും പോരാഞ്ഞ് തണുത്ത മിനറല്‍ വാട്ടര്‍ ഫ്രീയായി തരുവാനും ഉള്ള വിശാ‍ലമനസ്കത കാണിച്ചു.

ഇനിയും മെട്രോയില്‍ കയറാന്‍ പോകുമ്പോള്‍ കൂട്ടത്തില്‍ ആരെങ്കിലും ഇങ്ങനെ ബോധക്ഷയം കാണിച്ചാല്‍ വലിയ ഏടാകൂടമില്ലാതെ ട്രെയിനില്‍ കയറിപ്പറ്റാം എന്ന് മനസ്സിലായി. എപ്പോഴും ബോധം ഇട്ടാല്‍ മെട്രൊ കിട്ടില്ല എന്നും വരാം. എപ്പോഴും ചക്ക ഇട്ടാല്‍ മുയല്‍ കിട്ടില്ല എന്നപോലെ.!

വണ്ടി ദൂരേന്ന് വരുന്നത് കണ്ടപ്പോഴേ ആള്‍ക്കാര്‍ തിക്കിത്തിരക്കി വാതിലിനടുത്ത് റെഡിയായി നിന്നു.

ഒച്ചയും ഹോണടിയും ഇല്ലാതെ ഒരു ഒച്ചിന് സ്പീഡ് കൂടിയ പോലെ ആറ് ബോഗിയുള്ള എഞ്ചിന്‍ ഇല്ലാത്ത മെട്രോട്രെയിന്‍ കൂക്കില്ലാതെ സ്റ്റേഷനിലെ മിന്നിത്തിളങ്ങുന്ന പ്ലാറ്റ്ഫോമില്‍ വന്നുനിന്നു. അതില്‍ ഒരുവിധം ബദ്ധപ്പെട്ട് കേറിക്കൂടി. പിന്നെ ഒച്ചയില്ലാതെ മര്യാദക്കാരനായി മെട്രോ പുറപ്പെട്ടു.

നമ്മുടെ ഡേഎക്സ്പ്രസ്സ് പോലെ ഷൊര്‍ണ്ണൂര്‍-എറണാകുളം ഷട്ടില്‍ പോലെ ജനനിബിഢമായിരുന്നു അതിനകം. സീറ്റുകള്‍ വിരളം, അതിലാളുകള്‍ നിബിഢം. ബാക്കിയുള്ള ജനങ്ങള്‍ കിട്ടാവുന്ന കമ്പികളില്‍ തൂങ്ങിയാടി നില്‍പ്പുണ്ട്.

കയറ്റമിറക്കമുള്ള റെയിലിലൂടെ വണ്ടി നിശ്ശബ്ദമായി പാഞ്ഞു. ഓരോ അഞ്ചുമിനിറ്റുതോറും സ്റ്റേഷനുകളാണ്. അവിടേന്നെല്ലാം ആളെയെടുത്ത് വണ്ടി മുന്നോട്ട്..

പിന്നെ ഒരു തുരങ്കം വഴി താഴോട്ട് പാതാളത്തിലേക്ക്.. നാലര കിലോമീറ്റര്‍ ദൂരം ബര്‍ദുബായ് ദേര ദേശത്തെ വിഭജിക്കുന്ന ക്രീക്കിലെ വെള്ളത്തിനടിയിലൂടെ ഓടിയിട്ട് മെട്രോട്രെയിന്‍ പിന്നെ പൊങ്ങുന്നത് ദേര സിറ്റിസെന്റര്‍ സ്റ്റേഷനിലാണ്. അവിടേന്നും ആളെയിറക്കി കേറ്റി പാഞ്ഞ് എയര്‍പോര്‍ട്ട് മൂന്നാം ടെര്‍മിനലില്‍ നിന്നു.

ശരിക്കും നമ്മുടെ നാട്ടിലെ പോലെ ആള്‍ക്കാര്‍ തിക്കിത്തിരക്കി നില്‍ക്കുന്നത് കണ്ടു. ഒരു വ്യത്യാസം മാത്രം, “ചായ് കാപ്പി വടേയ്” എന്നുവിളിച്ച് നടക്കുന്ന ചായക്കാര്‍ ഇവിടെയില്ല, അതുപോലെ സ്റ്റേഷനുകളും വണ്ടിയ്ക്കകവും എക്സ്റ്റ്രാ ക്ലീന്‍! പുത്തനച്ചി പുരപ്പുറം തൂക്കും എന്ന് പറയുമ്പോലെ ആകില്ല എന്ന് ആശിക്കാം.

നമ്മുടെ വണ്ടി പോകുന്നതിനപ്പുറത്തെ ട്രാക്കിലൂടെ എതിരേ വേറെ മെട്രോട്രെയിന്‍ പോകുന്നത് കാണാം. അനക്കമില്ല, കുലുക്കമില്ല, ശബ്ദമില്ല. ഒരു ട്രെയിന്‍ ഒക്കെയാവുമ്പം മിനിമം ഒരു കുലുക്കമോ ഞരക്കമോ ഹോണടിയോ എങ്കിലും വേണമായിരുന്നു എന്ന് തോന്നും.

പ്ലാറ്റ്ഫോമില്‍ നമ്മളെ സഹായിക്കാന്‍ സന്നദ്ധരായ കസ്റ്റമര്‍ സെര്‍വീസ് സ്റ്റാഫ് ഇഷ്ടമ്പോലെയുണ്ട്. പിന്നെ സര്‍വീസ് ആരംഭിച്ച അന്ന് അറിയാതെ എമര്‍ജന്‍സി ലിവര്‍ പിടിച്ച് താഴ്ത്തിയ പലര്‍ക്കും താക്കിത് നല്‍കിയിരുന്നു. ഇനി അതില്‍ തൊട്ടാല്‍ രണ്ടായിരം ദിര്‍ഹംസ് (25000 രൂ) കൊടുക്കണം.

വണ്ടിയ്ക്കകത്തോ സ്റ്റേഷനിലോ പുകവലിച്ചാല്‍ 200 ദിര്‍ഹംസ് മാത്രം ഫൈന്‍ കൊടുത്താല്‍ മതി, വണ്ടിക്കകത്ത് ഭക്ഷണം കഴിച്ചാലും അത്ര കൊടുക്കേണ്ടിവരും.

ഏതായാലും ട്രാഫിക് ജാമില്‍ പൊറുതിമുട്ടിയിരുന്ന ദുബായ് നഗരത്തിന് മെട്രോ സര്‍വീസ് ഒരു ആശ്വാസവും മുതല്‍ക്കൂട്ടുമാണ്. നിത്യേന അന്‍പതിനായിരത്തോളം ആളുകള്‍ ഇതില്‍ സഞ്ചരിക്കുന്നതായാണ് കണക്കുകള്‍ സൂചിപ്പിക്കുന്നത്. അത്രയും വാഹനബാഹുല്യം റോഡില്‍ കുറഞ്ഞുകിട്ടിയത് ദുബായ് ഭരണാധികാരികള്‍ക്കും ജനങ്ങള്‍ക്കും ഒരുപോലെ സന്തോഷകരമായ കാര്യമാണ്.

വണ്ടിയുടെ വേഗതയില്‍ അന്ധാളിച്ച് ഇരിക്കുന്ന ഒരു ബാലനെ നോക്കൂ..

മുഖം - ഭാവകേളീപ്രതലം

2009-09-12T11:16:00.000+04:00

മുഖം മനസ്സിന്‍ കണ്ണാടിയല്ലോ..
അതില്‍ നിറക്കൂട്ട് കൊടുത്താല്‍
വൈവിധ്യമാര്‍ന്ന ഭാവകേളീ പ്രതലമല്ലേ..

ഇത് രണ്ടും മൈം

ഇത് രണ്ടും ചൊല്‍ക്കാഴ്ച

മൂന്ന് തുരുത്തുകള്‍/ മൂന്ന് ജന്മങ്ങള്‍..

2009-08-25T07:25:00.000+04:00

ഇവ മൂന്നും ജീവിതമാകും ജലാശയത്തില്‍ കഴിയുന്നു..

------------------------------------------------------

ഇവര്‍ മൂന്നും ജീവിതം തേടി യാത്ര തുടരുന്നൂ...

ക്യാറ്റ്'സ് ഹൈഡ് ന്‍ സീക്ക് (പൂച്ചാസ് ഒളിച്ചുകളി)

2009-08-22T23:55:00.003+04:00

അയ്യോ! മ്യാവൂ! എന്നോടൊളിച്ച് കളിക്കാന്‍ പറഞ്ഞിട്ട്.. കൂട്ടുകാരി എവിടേ പോയീ? ഇനി വല്ല പരുന്തോ പട്ടിയോ പിടിച്ചോണ്ട് പോയോ എന്റെ കാവിലമ്മേ??

ഒരു പ്രവാസി പെട്ടിക്കെട്ട് സീന്‍!

2009-08-08T08:59:00.003+04:00

പ്രവാസി മുറികളില്‍ മിക്കപ്പോഴും കാണാവുന്ന സീന്‍..
പ്രത്യേകിച്ചും ബാച്ചീസ് മുറികളില്‍ ഒരുത്തന്‍ നാട്ടില്‍ക്ക് പോകുമ്പോള്‍ (പരോള്‍ കിട്ടി പോവുക എന്ന് പൊതുഭാഷ),
സഹമുറിയന്മാര്‍ ഉല്‍സാഹക്കമ്മിറ്റിയായി പെട്ടിയില്‍ സാധനങ്ങള്‍ കുത്തിനിറക്കുന്നു. ഒടുക്കം നല്ല പ്ലാസ്റ്റിക് കയര്‍ വരിഞ്ഞുകെട്ടി അവനെ വിമാനം കയറ്റിവിടുന്നൂ..

തമാശയായി അരങ്ങേറുന്ന ചിലതുണ്ട്. പെട്ടിയില്‍ പെട്ടിക്കാരന്‍ അറിയാതെ ഉള്ളി, ഉണക്ക കുബൂസ് (റൊട്ടി), പഴയ ബനിയന്‍, ജെട്ടി എന്നിവയൊക്കെ വെച്ചിട്ടുണ്ടാവും.

ഒരിക്കല്‍ ഇതേപോലെ ആരോ പെട്ടിയില്‍ വെച്ച വലിയ ഉള്ളി രണ്ടെണ്ണം വീട്ടിലെത്തി പെട്ടി പൊട്ടിച്ചപ്പോള്‍ കണ്ട് പ്രവാസി കളയാന്‍ നേരം അയാള്‍ടെ ഭാര്യ പറഞ്ഞത്രേ:

"ഉള്ളിയെങ്കില്‍ ഉള്ളി, നാട്ടിലിപ്പോ ഉള്ളിക്ക് ഒക്കെ എന്താ വില!!"

'ദുബായ്പ്പുഴ' അബുദാബിയില്‍!

2009-05-14T05:40:00.001+04:00

മലയാള നാടക ചരിത്രത്തിലെ അതികായനായ തോപ്പില്‍ ഭാസിയെ യുവ കലാ സാഹിതിയുടെ ആഭിമുഖ്യത്തില്‍ മേയ് 15 വെള്ളിയാഴ്ച വൈകീട്ട് എട്ട് മണിക്ക് അബുദാബി കേരളാ സോഷ്യല്‍ സെന്ററില്‍ നടക്കുന്ന ചടങ്ങില്‍ അനുസ്മരിക്കുന്നു.

അനുസ്മരണ ചടങ്ങിനോടനു ബന്ധിച്ച് നാടക സൌഹ്യദം അവതരിപ്പിക്കുന്ന ‘ദുബായ് പുഴ’ എന്ന നാടകവും അരങ്ങേറും.

ശ്രീ. കൃഷ്ണദാസ് രചിച്ച 'ദുബായ് പുഴ' യുടെ നാടകാവിഷ്‌കാരം ഇസ്‌കന്തര്‍ മിര്‍സ രംഗകഥ ഒരുക്കി സം‌വിധാനം ചെയ്യുന്നു.

അരങ്ങില്‍:-
ബേബി ഐശ്വര്യ ഗൗരി നാരായണന്‍, ഷദ ഗഫൂര്‍, സ്റ്റെഫി, ആര്യ ദേവി അനില്‍

മാമ്മന്‍ കെ രാജന്‍, ജാഫര്‍ കുറ്റിപ്പുറം, മന്‍സൂര്‍, ഏറനാടന്‍ , ഇ.ആര്‍. ജോഷി, പി.എം.അബ്‌ദുല്‍ റഹിമാന് ‍,ഹരി അഭിനയ, കെ.വി. മുഹമ്മദാലി കൂടല്ലൂര്, അബൂബക്കര്‍, സഗീര്‍ ചെന്ത്രാപ്പിന്നി,സാബിര്‍ മാടായി,വിനോദ് കരിക്കാട്, ഇഖ്‌ബാല്‍, ശ്രീനിവാസ് കാഞ്ഞങ്ങാട്, ഷജീര്‍ മണക്കാട്, തോമസ് തരകന്‍.

സഹസം‌വിധാനം: സജ്ജാദ് നിലമേല്‍
സം‌വിധാന സഹായി: ഷജീര്‍ മണക്കാട്

കോര്‍ഡിനേറ്റര്‍: ശ്രീനിവാസന്‍ കാഞ്ഞങ്ങാട് & ഗഫൂര്‍ക്ക
കാര്യവാഹകന്‍: ശ്രീ. റോബിന്‍ സേവ്യര്‍

നിങ്ങളെ ഏവരേയും നാളെ പതിനഞ്ചാം തിയ്യതി രാത്രി എട്ടര മണിക്ക് അബുദാബിയിലെ കേരളാ സോഷ്യല്‍ സെന്റര്‍ അങ്കണത്തിലേക്ക് സാദരം ക്ഷണിക്കുന്നു.

'ദുബായ്പ്പുഴ' അബുദാബിയില്‍

അബുദാബിയിലെ നാടക പ്രവര്‍ത്തകരുടെ കൂട്ടായ്മയായ
'നാടക സൌഹ്യദം' അവതരിപ്പിക്കുന്ന എറ്റവും പുതിയ നാടകം, 'ദുബായ്പ്പുഴ' അബുദാബിയില്‍ അരങ്ങേറുന്നു.

മേയ് 15 വെള്ളിയാഴ്ച കേരളാ സോഷ്യല്‍ സെന്റര്‍ അങ്കണത്തില്‍
യുവ കലാ സാഹിതി യുടെ തോപ്പില്‍ ഭാസി
അനുസ്മരണ ത്തോടനുബന്ധിച്ച് അവതരിപ്പിക്കുന്ന ദുബായ്പ്പുഴ, എഴുപതുകളിലേയും എണ്‍പതുകളിലേയും
ഗള്‍ഫ് മലയാളികളുടെ പരിഛേദമാണ്.

അബുദാബി ശക്തി തിയ്യറ്റേഴ്സിന്‍റെ
സ്ഥാപക മെംബറും പ്രസിഡന്റുമായിരുന്ന
ക്യഷ്ണ ദാസിന്‍റെ അനുഭവ ക്കുറിപ്പുകളായ 'ദുബായ്പ്പുഴ' യെ ആധാരമാക്കി ഇസ്കന്ദര്‍ മിര്‍സ രചനയും സംവിധാനവും
നിര്‍വ്വഹിക്കുന്ന നാടകം,
പ്രണയത്തിന്‍റെയും പ്രതികാരത്തിന്‍റെയും വിരഹത്തിന്‍റെയും
കഥ പറയുന്നതോടൊപ്പം പ്രവാസ ജീവിത ത്തിന്റെ ചൂടും ചൂരും
കാണികള്‍ ക്ക് പകര്‍ന്നു നല്‍കുന്നു.

മുപ്പതോളം കലാ കാരന്മാര്‍ അണിയറയിലു അരങ്ങിലും
അണിനിരക്കുന്ന ദുബായ്പ്പുഴയുടെ ഓളങ്ങള്‍ പ്രവാസികളായ
നമ്മുടെ ജീവിതത്തിലെ തിരമാലകള്‍ ആയി തീര്‍‍ന്നേക്കാം

വരുവിന്‍ കാണുവിന്‍ ആസ്വദിക്കുവിന്‍...

കൂടുതല്‍ വിവരങ്ങളിവിടെ ഈ-പത്രം പേജില്‍:- തോപ്പില്‍ ഭാസി അനുസ്മരണം

ഓര്‍മ്മയുണ്ടോ ഈ മുഖം??

2009-04-29T19:54:00.003+04:00

ഓര്‍മ്മയുണ്ടോ ഈ മുഖം??

ഓര്‍മ്മ കാണില്ല. അന്ന് ഞാന്‍ സമുദ്രത്തിലെ വി ഐ പീ.
അന്നു നീ വെള്ളത്തില്‍ അല്ലല്ലോ?
ഇന്ന് ഈ മുഖം കാണാന്‍ ദിര്‍ഹംസ് മുടക്കി ടിക്കറ്റ് എടുത്ത്
താനും ഫാമിലിയും ഈ അക്വേറിയത്തില്‍ വരണം.
കാമറയില്‍ ഈ മുഖം ക്ലിക്കി കൊണ്ടുപോയി
ബ്ലോഗിലിടണം.

വിണ്ണില്‍ നിന്നും മണ്ണിലേക്ക്..

2009-04-21T09:30:00.000+04:00

ആകാശസീമയില്‍ പാറിപ്പറക്കുമ്പോള്‍
താഴെക്കാണുന്നവരെ പുച്‌ഛമായിരുന്നു
പുഴുക്കള്‍ പോലെ അറപ്പായിരുന്നു.

അന്ന് ഞാനോര്‍ത്തില്ല ഒരുനാള്‍
താഴേക്ക് വന്ന് പതിക്കുന്നത്

വിണ്ണില്‍ നിന്നും മണ്ണിലേക്ക്
പതിച്ച് മണ്ണായടിഞ്ഞ് അലിഞ്ഞ്
പുഴുക്കള്‍ ഭക്ഷണമാക്കി
ഇല്ലാതായികൊണ്ടിരിക്കുന്നു.

അംബരചുംബികള്‍

2009-04-13T09:09:00.001+04:00

അബുദാബീലെ അംബരചുംബികളും..

ചുറ്റുപാടുകളും (ബേര്‍ഡ്സ് ഐ വ്യൂ)

പ്രവാസഭൂമിയിലെ ജന്തുജാലങ്ങള്‍

2009-03-24T22:42:00.003+04:00

ഇവന്‍ ഇമ്പാലമാന്‍

അബുദാബീടെ അടുത്തുള്ള ഒരു ദ്വീപിലെ ഇട്ടാവട്ടത്ത് ഉല്ലസിച്ചുകഴിയുന്ന മാന്‍‌കൂട്ടങ്ങളില്‍ ഒന്ന് മനുഷ്യക്കൂട്ടത്തിലെ ഒരാളെ കണ്ട് നില്‍ക്കണോ അതോ പോകണോ എന്നറിയാതെ പകച്ചുനില്‍ക്കുന്നു. പിന്നെ ഓടെടാ ഓട്ടം ആയിരുന്നൂട്ടോ..

ഇത് മുതുക്കന്‍ ആമ

ഉദ്ധ്യേശം നൂറ്റമ്പതിലേറെ പ്രായം ആയിട്ടുള്ള ഒരു ആമ മുത്തച്ചന്‍. മനുഷ്യന്മാരെ കണ്ടാല്‍ ഓടി അടുത്തു വരും, നല്ല പുഞ്ചിരി തൂകി വല്ലതും തരാനുണ്ടോന്ന് ചോദിക്കാതെ തന്നെ ചോദിക്കും.

കാലിയായൊരു ഫാല്‍ക്കണ്‍ കൂട്.

കുഞ്ഞുങ്ങളെല്ലാം വലുതായപ്പോള്‍ പലവഴിപിരിഞ്ഞുപോയ്. ഫാല്‍ക്കണും വേറെ പാട്ടിനുപോയ്. ഒടുക്കം കെട്ടുറപ്പുള്ള കൂട് മാത്രം കാലിയായ്.
ദ്വീപില്‍ ധാരാളമായി കണ്ടുവരുന്ന ഫാല്‍ക്കണ്‍ എന്ന പക്ഷിരാജകുടുംബം കമ്പി, പ്ലാസ്റ്റിക്, മരക്കമ്പുകള്‍ കൊണ്ട് ബലമായി നിര്‍മ്മിക്കുന്ന കൂടുകള്‍ അല്‍ഭുതകരം.

ഇതാ ഒരിടത്ത് ഫാല്‍ക്കണും കുഞ്ഞുങ്ങളും..

കടലില്‍ നിന്നും വലിയ മല്‍സ്യങ്ങളേയും ആകാശത്തുനിന്നും പ്രാവുകളേയും മറ്റ് പക്ഷികളേയും ഇരയാക്കി തീറ്റയ്ക്കുവേണ്ടി എത്തിച്ചുകൊടുക്കുന്ന കാഴ്ച ഗംഭീരമായിരുന്നു.

വീണ്ടും ചില കാര്‍ മ്യൂസിയവിശേഷങ്ങള്‍..

2009-01-30T22:00:00.000+04:00

ഇതാ ഈ കാണുന്നതാണ്‌ ചലിക്കുന്ന വല്യ ബംഗ്ലാവ്! ഇതിലും ഒരുപാട് മുറികളും കോലായ, വരാന്തകളും മാളികയും ഡിഷ് ആന്റിനയും റോഡ് എര്‍ത്ത് സര്‍‌വേ സജ്ജീകരണവും ഇനിയില്ലാത്തതൊന്നുമില്ല. ഇത് ഗിന്നസ്സ് ബുക്കില്‍ ഇടം നേടിയവനാണ്‌. ഷേയിക്ക് പുത്രന്‍ വിവാഹം കഴിഞ്ഞ് വധുവുമായി കുടുംബാംഗങ്ങളൊത്ത് ഈ ചലിക്കും വീട്ടില്‍ അടിച്ചുപൊളിച്ചാണ്‌ എത്രയോ കിലോമീറ്ററുകള്‍ ദൂരം സഞ്ചരിച്ച് സൗദിയിലേക്ക് പോയിവന്നത്. (പോയ വഴി പുല്ല് മുളച്ചിട്ടേയുണ്ടാവില്ല)

ഇത് വിചിത്രമാം ഒരു ബെന്‍സ് കാര്‍. ട്രക്കിന്‌ ബെന്‍സിലുണ്ടായ ഒരു സങ്കര സന്തതി!

ആ കാണുന്നത് വല്യോരു ജീപ്പ്. ഇന്നത് മ്യൂസിയം കാന്റീന്‍ ആക്കിയിരിക്കുന്നു. ചായ കുടിക്കാന്‍ കേറണമെന്ന് തോന്നിയെങ്കിലും ഇനി കേറിയിരിക്കും നേരത്ത് അതെങ്ങാനും ഉരുണ്ടു റോഡിലിറങ്ങിയാലോ എന്ന് കരുതി ഒഴിവാക്കി.

ഇവനാണ്‌ ഫോര്‍ഡ് കാര്‍ മുത്തശ്ശന്‍. സാക്ഷാല്‍ ഫോര്‍ഡ് സൃഷ്‌ടിച്ച ആദിമകാര്‍. ആവി എഞ്ചിനുള്ള റിഷാവണ്ടി ഒത്തിരി പലവക വാഹനങ്ങളുടെ നടുക്ക് ഇവിടെ..

ആഹഹായ്!! ഇത് നമ്മുടെ പത്മിനി അല്ലേ? അതെന്നെ, ഫിയറ്റ് പത്മിനി നല്ല സുന്ദരിക്കുട്ടിയായി കുറേ പോക്കിരിക്കാറുകളുടെ ഇടയില്‍ വെട്ടിത്തിളങ്ങി ഇരിക്കുന്നത് കണ്ടപ്പോള്‍ നമ്മുടെ ഉള്ളിലെ ഭാരതീയന്‍ അഭിമാനം കൊള്ളുന്നു!

ഫിയറ്റ് പത്മിനികള്‍ ചുവപ്പും വെള്ളയും പുടവകള്‍ അണിഞ്ഞ് സുന്ദരിക്കുട്ടികളായി ഇരിക്കുന്നു.

റെയറായ കാര്‍ മ്യൂസിയം (അബുദാബി)

2009-01-22T23:01:00.000+04:00

അബുദാബി ഷേയ്ക്ക് ഹംദാന്‍ സ്വകാര്യമായി സൂക്ഷിച്ചുവരുന്ന നാനാതരം, വിവിധ, അനവധി, നിരവധി കാറുകളും മറ്റ് വാഹനങ്ങളും ഉള്ളതാണീ കാര്‍ മ്യൂസിയം.

മുസാഫയില്‍ നിന്നും മുപ്പത് കിമീ ദൂരത്ത് വിജനമായ അല്‍ ഫുജിം റോഡില്‍ ഒരു കോണില്‍ വലിയ പിരമിഡ് പോലെ അകലേനിന്നും തന്നെ നമ്മുടെ ദൃഷ്‌ടിയില്‍ മ്യൂസിയം പതിയും.

പിരമിഡിനകത്തെ അല്‍ഭുതങ്ങള്‍ കാണുവാന്‍ നമുക്കൊന്ന് പോയാലോ?

പിരമിഡ് മേല്‍ക്കൂരയുടെ ഒരു പാതിയും നീലാകാശത്തിന്റെ ഒരു പാതിയും ചേര്‍ന്നാല്‍...

ഇതൊരു ശൂന്യാകാശപേടകമല്ല. ഷേയ്ക്കിനും ഫാമിലിക്കും അവധിക്കാലം കഴിയാന്‍ വല്ലപ്പോഴും ഉപയോഗിക്കുന്ന ഒരു ഭൂഗോള ചലിക്കും വീട് ആണിത്!

ഇതിനകത്ത് പത്ത് നിലകളിലായി ശീതീകരണ കിടക്കറയും കുളിമുറിയും അടുക്കളയും അങ്ങനെ എല്ലാ ആഡംബര സൗകര്യങ്ങളും ഉള്‍ക്കൊള്ളിച്ച ഒരു ചലിക്കും സൗധം!

ഇനി ഒരേയിടത്ത് കഴിയുന്നതില്‍ മുഷിപ്പ് തോന്നിയാല്‍ വലിയ ട്രെയിലറില്‍ കെട്ടിവലിച്ച് ഉരുട്ടിക്കൊണ്ടുപോകാന്‍ ഭീമാകാരമായ ടയറുകള്‍ ഘടിപ്പിച്ച് സജ്ജീകരിച്ചിട്ടുമുണ്ട്.

(കൂടുതല്‍ കാര്‍ മ്യൂസിയം ഫോട്ടോസും വിശേഷങ്ങളും ഉടന്‍..)

പ്രവാസീ പുലീ..!

2009-01-05T23:26:00.000+04:00

ക്യാമറയില്‍ മിന്നായം പോലെ അവ മിന്നി..

ബുഷ് ഷൂഏറ് നേരിടുന്നതിനും മുന്നെ ഷൂ ഇട്ട് ഡപ്പാങ്കുത്താടി പുലികള്‍ ഗള്‍ഫിലഴിഞ്ഞാടി!

ഇതും പുലീസ്, ഷൂ ഇട്ട പ്രവാസിപ്പുലീസ്..!

വിട ചൊല്ലുക, സ്വാഗതം ഓതുക.

2008-12-30T07:55:00.000+04:00

പറന്നകന്നുപോകുന്ന

രണ്ടായിരത്തിയെട്ടേ..

പ്രശ്‌നബാധിത രക്തപങ്കിലമാം

ഭൂമിവിട്ട്‌ പോകുക പ്രാവുകളേ

വിട എന്നെന്നേക്കും വിട.

#2008#

-----------------------------------

പറന്നിറങ്ങുന്ന

രണ്ടായിരത്തിയൊമ്പതിന്‌

ഊഷരഭൂമിയിലേക്ക്‌

സമാധാനദൂതുമായ്‌

സ്വാഗതം സ്വാഗതം...

{2009}

(ഇത് അബുദാബി അല്‍ ഫുജൈം കാര്‍ മ്യൂസിയം പള്ളിമിനാരമുകളിലെ പ്രാവുകള്‍)

ക്രിസ്സ്മസ്സിനായ് കോടമഞ്ഞ്

2008-12-24T08:10:00.000+04:00

ഇന്ന് കാലത്ത് ഫ്ലാറ്റിലെ ബാല്‍‌ക്കണിയില്‍ നിന്നുള്ള ദൃശ്യം.

ക്രിസ്സ്‌മസിനെ വരവേല്‍ക്കാന്‍ കുളിരണിയിച്ചുകൊണ്ട് എമറാത്തും ഒരുങ്ങി..
ഏവര്‍ക്കും ക്രിസ്സ്മസ്സ് ആശംസകള്‍ നേരുന്നു.

ചെരിഞ്ഞ കൊടിമരം!

2008-12-21T18:35:00.000+04:00

കീഴേന്ന് നോക്ക്യാല്‍...

ചെരിഞ്ഞു നോക്ക്യാല്‍...

ഒന്നൂടെ ചെരിഞ്ഞു നോക്ക്യാല്‍...

ഇത് അബുദാബി കോര്‍ണിഷിലെ ഫ്ലാഗ് പോസ്റ്റ്

പീരങ്കിയമ്മയും കുട്ടിപ്പീരങ്കിയും.

2008-12-06T13:05:00.000+04:00

പീരങ്കിയമ്മയും കുട്ടിപ്പീരങ്കിയും ആരെയാണാവോ വെടിപൊട്ടിക്കാതെ കാത്തിരിക്കുന്നത്!

പണ്ടെങ്ങാണ്ടോ ഏതോ യുദ്ധഭൂമിയിലേക്ക് യാത്രപോയ പീരങ്കിപ്പടയാളിയെ കാത്തിരിപ്പാണോ?

ചോദിക്കാന്‍ ആശിച്ചെങ്കിലും മൗനം മാറ്റി അവര്‍ വെടിചീറ്റുമോ എന്നുതോന്നി. ചുമ്മാ ക്ലിക്കി ഞാന്‍ എന്റെ പാട്ടിനുപോന്നു.

(അബുദാബി കോര്‍ണിഷിലെ മ്യൂസിയം വളപ്പില്‍ നിന്നും പൊതിയാക്കിയത്)

വശ്യമാം മൂന്നാര്‍..!

2008-11-09T20:25:00.002+04:00

മൂന്നാറിന്‍ വശ്യതയാര്‍ന്ന പ്രകൃതിയെ ഒപ്പിയെടുക്കുന്ന ക്യാമറാമാനും കൂട്ടരും. പക്ഷെ മുന്നിലേക്ക് അപ്രതീക്ഷിതമായി വന്നെത്തിയത് ഒരു കാളക്കൂട്ടം (ആനക്കൂട്ടം ആവാഞ്ഞത് ആയുസ്സിന്റെ ബലം!).

പിന്നീടാണറിഞ്ഞത് അവയല്ല അപ്രതീക്ഷിതം, ക്യാമറമാനും കൂട്ടരും ഞാനുമാണ്‌ കാളക്കൂട്ടം വിലസുന്ന താഴ്വാരത്തില്‍ അവയെ ഞെട്ടിച്ചുകൊണ്ട് അപ്രതീക്ഷിതമായെത്തിയത്! ഞങ്ങള്‍ പോയവഴി (പുല്ലുപോലും മുളച്ചില്ല). ഇരുവശങ്ങളിലും തേയിലമുളച്ചുകിടപ്പുണ്ട്.

ഈ വഴി നിര്‍ഗമിക്കവെ വൃഥാ ഒരു സുന്ദരി എതിരെ അലസഗമനം ചെയ്യുന്നത് മനക്കണ്ണില്‍ കണ്ടുകൊണ്ട് പൊക (മറ്റേ ബീഡിയല്ല, സാദാസിഗരറ്റുപൊക) വളയമാക്കിവിട്ടോണ്ടിരുന്നു.

"Behold her single in the field"പണ്ട് പഠിച്ച വില്യം വേഡ്സ്‌വെര്‍ത്തിന്റെ കവിത 'സോളിറ്ററിറീപ്പര്' പുനരവതരിക്കുന്ന താഴ്വരയും മുകളിലെ മേഘക്കൂട്ടങ്ങളും.

ഹൈക്ലാസ് അറബിക്കാളക്കൂറ്റന്‍!

2008-11-03T19:52:00.001+04:00

അബുദാബീലെ പഴേ മ്യൂസിയം കോമ്പൗണ്ടിലെ ഹൈക്ലാസ്സ് അറബിക്കാളക്കൂറ്റന്‍.

മൂപ്പര്‌ ചൂടുസഹിക്കാഞ്ഞ് ഫുള്‍-ടൈം വല്യ കറങ്ങും ഫാനിന്‍ കാറ്റും കൊണ്ട്
മോന്ത അങ്ങോട്ടെന്നെ തിരിച്ചെച്ച് ഒരേനില്‍പ്പെന്നെ!
ഒരുനിമിഷം ഞാന്‍ ഞമ്മളെ നാട്ടിലെ നാടന്‍ കാളമൂരിക്കുട്ടന്മാരെ കുറിച്ചോര്‍ത്തുപോയ്..
അവറ്റകള്‍ വിശാലമായ കൊളങ്ങളിലും പാടങ്ങളിലും വല്ലതും ചവച്ചയവറിറക്കി
നിര്‍ലോഭം വിലസുന്ന സൊഖം ഈ അറബിക്കാളക്കൂറ്റനു അറിയില്ലാലോ.

ചാഞ്ചാടിയാടീ ഉറങ്ങൂനീ..

2008-10-30T19:36:00.001+04:00

ഇവ അമ്മത്തൊട്ടിലുകളല്ല.
മൂന്നാറിലെ തേയിലത്തൊഴിലാളികളായ അമ്മമാര്‍ പണിയ്ക്കുപോകുന്നേരം കുഞ്ഞുങ്ങളെ നഴ്സറിയിലെ തൊട്ടിലുകളില്‍ കിടത്തും.

ഒരു ആയ നോക്കുവാനുണ്ടാവും.

വൈകുന്നേരം പണികഴിഞ്ഞ് ക്ഷീണിച്ച് വരുന്ന അമ്മമാര്‍ വാതോരാതെ കരയുന്ന അവരവരുടെ കുരുന്നുകളേയും എടുത്ത് കുടിലുകളിലേക്ക് പോകും.

ഞാനും കൂട്ടരും ചെല്ലുമ്പോള്‍ കുഞ്ഞുങ്ങള്‍ സമാധാനപ്രിയരും പുഞ്ചിരിതൂകുന്നവരും ആയിരുന്നു..

പ്രവാസഭൂവില്‍ പട്ടാപകലൊരു ആത്മഹത്യ!!

2008-10-19T21:02:00.000+04:00

ആത്മഹ്യാശ്രമം പോലും കൊടും‌പാപം ആയിട്ടുള്ള പ്രവാസഭൂവില്‍ പട്ടാപകലൊരു ആത്മഹത്യ അരങ്ങേറിയിരിക്കുന്നു! ഇതാ ഇവിടെ ഇങ്ങനെ...

അതൊരു പാവം പാവം ടെഡ്ഡിബിയറായിരുന്നു. നല്ലകാലം ഈ ഫ്ലാറ്റിലെ കുഞ്ഞോമനകളുടെ അരുമയായൊരു ടെഡ്ഡിക്കരടിക്കുട്ടന്‍ ഒടുവില്‍ എന്തിനീ കടും‌കൈ ചെയ്തു എന്റീശ്വരാ..! ഒരു ഷെഡ്ഡിവള്ളിയില്‍ ടെഡ്ഡിബിയറിന്റെ ഡെഡ്ബോഡി വെയിലേറ്റ് മാസങ്ങളോളം സ്പോട്ടില്‍ തന്നെ തൂങ്ങിയാടിക്കിടക്കുന്നു.. പാവം ഡിയര്‍ കരടി..

പുകഞ്ഞുപോയ ആയുസ്സുകള്‍...

2008-10-03T21:55:00.000+04:00

ഇതും ഒരു ചട്ടി, കുറ്റിച്ചട്ടി!

മുളങ്കാലില്‍ താങ്ങിനിര്‍ത്തിയ സിഗരറ്റുകുറ്റിച്ചട്ടി..

ഈ ചട്ടിയെ കിട്ടിയത് നമ്മുടെയെല്ലാം പ്രിയങ്കരനായിട്ടുള്ള ഒരു ദുബായ് ബ്ലോഗന്‍ന്റെ (?) അധോലോകമുറ്റത്തുവെച്ച്..

(ആ ബ്ലോഗന്‍ ആരാന്ന് ഞാന്‍ പറഞ്ഞാല്‍ ഇതേപോലെ ഞമ്മളേയും പുകച്ചുകളയും!)

സിദ്ധാശ്രമം ഒരു നിഗൂഢസ്മാരകം!

2008-09-25T14:01:00.000+04:00

മാവൂര്‍ റോഡ് വഴിവന്ന് കോഴിക്കോട് മെഡിക്കല്‍ കോളേജ് കഴിഞ്ഞ് ഒരു കീ.മീ കഴിഞ്ഞെത്ത്യാല്‍ ഒരു സിനിമാ കൊട്ടക (സരോജ് ടാക്കീസ്) കാണാം. ഈ കൊട്ടകയുടെ ഏതോ ഭാഗത്തായിട്ട് വരും ഞാന്‍ വസിക്കുന്ന ഭവനം. -:) (ഞാന്‍ പറഞ്ഞുവരുന്നത് അതിനെപറ്റിയല്ല).

പിന്നേം മുന്നോട്ട് ഇറക്കമിറങ്ങി വരുമ്പോള്‍ വലതുഭാഗത്തായിട്ട് കാണുന്ന ഭംഗിയുള്ള ഒരു കൊച്ചു ഓലവട്ടവീട് ശ്രദ്ധിച്ചില്ലേ.. വട്ടത്തില്‍ ഓലമേഞ്ഞതും നാലു കൊച്ചുവാതിലുകശ് ഉള്ളതുമായ പച്ചക്കുമ്മായം പൂശിയ വട്ടവീട്! ചുമരില്‍ നടുക്കായിട്ട് അറബിഅക്ഷരങ്ങല്‍ വരച്ചിട്ടിരിക്കുന്നു, സമീപം കല്‍‌പടവുകളുള്ള കിണറില്‍ വറ്റാത്ത കുളിരേകും ദാഹജലം. വഴിയാത്രക്കാര്‍ക്ക് യഥേഷ്‌ടം ദാഹശമനത്തിനത് ശേഖരിച്ചുവെച്ച 'പിടാവ്' (സിമന്റ് ഭരണി). അതിലേപോകുമ്പോഴെല്ലാം ഞാനും കൗതുകമോടെ അവിടെ നിന്നുനോക്കാറുണ്ട്.

ഈ സിദ്ധാശ്രമത്തിന്റെ ചരിത്രം ഈയ്യിടെയാണ്‌ അറിയുന്നത്.
ഇവിടെ എവിടേനിന്നോ വന്നെത്തിയ ഒരു മുസ്ലീം സിദ്ധന്‍ തപസ്സുപോലെ ഉപവാസമൊക്കെയായി കഴിഞ്ഞുകൂടിയിരുന്നത്രെ. ഒരു സൂഫിവര്യന്‍ ആയിരുന്നു അതെന്നും ഐതിഹ്യമുണ്ട്.

ആ സൂഫിവര്യന്‍ സദാനേരവും ഖുര്‍‌ആന്‍ പാരായണം ചെയ്ത് കാലങ്ങളോളം ഇവിടെ വസിക്കുവാന്‍ വേണ്ടി സ്വയം കെട്ടിപ്പടുത്ത് മേഞ്ഞതാണ്‌ നാം ഇപ്പോള്‍ കാണുന്നത്..
ഇദ്ദേഹം പരിപൂര്‍‌ണ നഗ്നനായിക്കൊണ്ട് മന്ത്രിച്ചുകൊണ്ട് ഒരേപോസില്‍ ചമ്രം പടിഞ്ഞ് ദിനങ്ങളോളം ഇരിക്കാറുണ്ടായിരുന്നത്രെ. ഇത് കാണാന്‍ ത്രാണിയില്ലാത്ത, ഇഷ്‌ടമില്ലാത്ത പരിസരവാസികള്‍ ഒടുവില്‍..
ഇന്ദിരാഗാന്ധി ഭരിച്ചകാലത്തെ അടിയന്തിരാവസ്ഥ സമയത്ത് പോലീസില്‍ സിദ്ധനെ ഒറ്റിക്കൊടുക്കുകയും
പോലീസെത്തി ഈ നഗ്നനായ സൂഫിസിദ്ധനെ തൂക്കിയെടുത്ത് എങ്ങോട്ടോ പോയിമറയുകയും ആണുണ്ടായതത്രേ.

പിന്നീടാരും സൂഫിയെപറ്റി ഒരു വിവരവുമറിഞ്ഞില്ല. എല്ലാത്തിനും മൂകസാക്ഷിയായി ഇന്ന് ഈ സിദ്ധാശ്രമവും പരിസരത്തെ വറ്റാക്കിണറും മാത്രം അതിജീവിച്ചു നില്‍ക്കുന്നു.

പ്രായം മൂത്ത കളിമണ്‍ പ്രതിമകളേ..

2008-09-22T15:58:00.000+04:00

ഒറ്റകൊമ്പന്‍ മാനേ മധുരകരിമ്പേ..

വിഷണ്ണനായ നായ്‌ക്കുട്ടീ..

മെലിഞ്ഞ മൊതലാ..

കൈ പോയ കുട്ടീ..

ഇക്കാണുന്ന മാന്‍, നായ്‌ക്കുട്ടീ, മൊതല, കൈ പോയ കുട്ടീ എന്നിവ ബ്രിട്ടീഷുകാര്‍ ഭരിച്ചകാലത്ത് കളിമണ്ണില്‍ ഉണ്ടാക്കപ്പെട്ടവയാണ്‌. സുപ്രസിദ്ധനടി കെ.ആര്‍.വിജയയുടെ ഉടമസ്ഥതയിലുള്ള ഫറോക്ക് കെ.ആര്‍.വി.ഓട്ടുകമ്പനിവളപ്പില്‍ നിന്നും റെറ്റിനയില്‍ പൊതിഞ്ഞെടുത്തവ.

എന്നെ ആരെങ്കിലും ഒന്നു കുളിപ്പിച്ചുതര്വോ..!

2008-09-12T19:17:00.000+04:00

ഒരു പാവം കാര്‍ കിടക്കുന്നകിടപ്പുകണ്ടോ അതും എമറാത്തിന്‍ തലസ്ഥാനമായ അബുദാബീല്‌!

എന്നെ ആരെങ്കിലും ഒന്നു കുളിപ്പിച്ചുതര്വോ..! അല്ലെങ്കിലൊന്ന് പൊടിതട്ടിത്തര്വോ..!

ആ കാറും ഈ കാറുകളെപ്പോലെ ക്ലീന്‍ നീറ്റ് മോഡലായിരുന്നു ഒരുകാലത്ത്.. ഒരുപക്ഷെ, ഉടമ നാട്ടീപോയതാവാം, മടങ്ങിവരാത്തതാവാം, അല്ലെങ്കില്‍ അടവുതെറ്റിച്ചതാവാം, അതുമല്ലെങ്കില്‍ എണ്ണയടിക്കാന്‍ കാശില്ലാതെ നാടുവിട്ടതുമാവാം. കാറേ നീ കിട, വല്ലൊരും വരും നിന്നെ ഹെല്‍‌പാന്‍...!

മലപ്പുറം ബ്ലോ-നേര്‍ച്ചയില്‍..

2008-07-13T20:11:00.000+04:00

ഡി.പ്രദീപ് കുമാര്‍ & കുറുമാന്‍ നമ്പറിറക്കല്‍

തോന്ന്യാസി & കുറുമാന്‍ കൂട്ടിമുട്ടല്‍

മന്‍സൂര്‍ നിലമ്പൂര്‍ (മഴത്തുള്ളിക്കിലുക്കം) & കുറുമാന്‍ തട്ടിമുട്ടല്‍

കുറുമാന്‍ കത്തിഫൈ & ഓഡിയന്‍സ് സഹിക്കഫൈ..

മൂന്നാര്‍ സീന്‍സ് തുടരുന്നൂ...

2008-06-26T22:34:00.000+04:00

വരയാടിനെ കിട്ടീല, കൊച്ചീലെ വരയില്ലാത്ത ആടും കുട്ടീം

മലകള്‍ പുഴകള്‍

ഭൂമിക്ക് കിട്ടിയ സ്‌ത്രീധനങ്ങള്‍

ഈ ഭംഗിയുടെ കയങ്ങളില്‍ പണ്ട് വിനോദയാത്രയ്ക്ക് വന്ന ഏതാനും വിദ്യാര്‍ത്ഥികള്‍ പാലം പൊട്ടിവീണ് ഇല്ലാതായിരിക്കുന്നു!

ഈ വഴിയിനിയും വരുവാനൊരു മോഹം..

മൂന്നാര്‍ കാഴ്‌ചകള്‍...

2008-06-20T22:20:00.000+04:00

ഈ ലോറിയില്‍ കേറിയാണ് ഞാന്‍ മൂന്നാറില്‍ കാലുകുത്തിയത്! വീരപ്പന്‍‌മീശവെച്ച അണ്ണാച്ചിഡ്രൈവറുടെ പേര് വീരപാണ്ട്യരാജ്.

വീരപാണ്ട്യരാജിന്റെ ശെന്തമിഴ് ‘വെട്ടുകത്തി‘ നിര്‍ബാധം തുടരവേ ഞാന്‍ ബോധം കിട്ടാന്‍ താഴ്‌വാരത്തോട്ട് നോക്കി..

ദൂരെ ദൂരെ പഞ്ഞിക്കെട്ടുപോലെ മേഘക്കൂട്ടം മേഞ്ഞുപോകുന്നതും കണ്ടു.

പെട്ടെന്നായിരുന്നു ഒരു വെള്ളിടി മിന്നിവെട്ടിയത്! ആ മരം ഉലഞ്ഞാടി..

ഇങ്ങരികില്‍, ഇടിമുഴക്കം കേട്ട് ശടുകുടൂ വെള്ളച്ചാട്ടം, തിരിഞ്ഞു നോക്കുമ്പോള്‍..
“കാള വാലുപൊക്കുമ്പഴേ അറിയാല്ലോ അത് എന്തിനാണെന്ന്?“ എന്നും ചോദിച്ച്
മൂന്നാര്‍ പിള്ളേര് പല്ലിളിച്ചു. ഭാഗ്യം ഞാന്‍ കാളയെ വെട്ടിമാറിയതിനാല്‍ മൂത്രം ആകാതെ തടികാത്തു. ഷൂട്ടിംഗ് മുടങ്ങാതെ നടന്നു.

പച്ചപ്പുല്‍ചാടിയും എഴുത്തുകാരനാവാനൊരു മോഹവും..!

2008-06-18T21:43:00.000+04:00

പച്ചപ്പുല്‍ചാടീ (ഭാഗ്യം‌കൊണ്ട്‌) വന്നല്ലോ!
എഴുത്തുകാരനാകാനുള്ള മോഹം പൂവണിയുമോ?
എന്നിട്ടുവേണം തിന്നുവാനുള്ളവ എന്നും മേടിയ്ക്കാന്‍..

മഴക്കാലമല്ലേ.. മഴയല്ലേ...

2008-06-13T23:21:00.000+04:00

മഴക്കാലം വരവായനേരം മഴക്കാറുള്ള ആകാശത്തിനുകീഴില്‍ കണ്ട കാഴ്ചകള്‍.
ജാലകങ്ങള്‍ക്കപ്പുറം..
കോഴിക്കോട് കടാപുറത്തെ കാറ്റാടിമരങ്ങള്‍
ഏറനാടന്‍ മലയോരം
എരഞ്ഞിക്കല്‍ റിവര്‍ റിസോര്‍ട്ട്
ചിമ്മിനിവിളക്ക് തെളിയിക്കാന്‍..

കല്‍‌പകഫിലിംസ് ‘വാര്‍ത്ത’

2008-06-06T20:27:00.000+04:00

കോഴിക്കോട് സിറ്റിയില്‍ ഒരു പാലത്തിനുചോട്ടിലിന്നും കാണാം ഈ ‘വാര്‍ത്ത’.
എത്രയെത്ര ബാനറുകള്‍ വന്നു, എത്ര പോസ്റ്ററുകള്‍ പതിച്ചു എന്നിട്ടും 86-ലെ ഈ വാര്‍ത്ത ഇന്നുമുണ്ട്.!

ഇത് എന്‍.എല്‍ ബാലകൃഷ്‌ണന്‍ (തടിയന്‍) തന്റെ 40 വര്‍ഷങ്ങളുടെ സിനിമാവിശേഷങ്ങള്‍ മമ്മൂട്ടിടൈംസ് ലേഖകന്‍ എം.എം.നവാസുമായിട്ട് പങ്കുവെയ്ക്കുന്നു. (പൃഥ്വിരാജ് സിനിമയായ തിരക്കഥയുടെ കോഴിക്കോട് ലൊക്കേഷനില്‍ നിന്നും)

സ്‌ക്കൂള്‍ ഓപ്പണ്‍; അവധിക്കാലം ക്ലോസ്ഡ്!

2008-06-02T22:39:00.000+04:00

ദേ പിന്നേം സ്‌ക്കൂള്‍ തുറന്നു!

അവധിക്കാലത്തെ അടിപിടി! നോട്ട് ബ്ലോഗടിപിടി!!

ഈ അടിപിടി അവധിക്കാലടിപിടി.

ഇത് കുരുന്നുകള്‍ക്കുള്ള ടൈം ടേയ്ബിള്‍! ബ്ലോഗര്‍ക്കും ഉപകാരപ്രദം തന്നെ!!

തെരുവുപാട്ടുകാര്‍ (ഫോട്ടോ+വീഡിയോ)

2008-05-18T06:53:00.001+04:00

ഒരു ചാണ്‍ വയറിനുവേണ്ടി പാടട്ടെ ഞങ്ങള്‍...
പാടാം ഈ ഗാനം,
ഇന്നലെകള്‍ ഇതുവഴിയേ പോയീ,
നൊമ്പരമാം പൊന്നുഷസ്സും പോയീ,
പാടാം ഈ ഗാനം..ഞങ്ങളുടെ പാട്ട് ഒന്നുകാണൂ, വല്ലതും ഇട്ടുപോകൂ ബൂലോഗരേ..

പാലാപ്പീസും പുലിബോര്‍ഡും!!!

2008-05-10T19:40:00.000+04:00

പാലാപ്പീസ് എവിടെയെന്ന് ഇതാ ചൂണ്ടുപലകയില്‍!!
മെഡിക്കല്‍ കോളേജിലെ രോഗികള്‍ക്ക് പാല്‍ വാങ്ങുവാന്‍ പാത്രങ്ങളുമായി പാല്‍ ബൂത്ത് തേടിപ്പോകുന്ന പാവങ്ങള്‍ ‘പാലാപ്പീസിലേക്കുള്ള ചൂണ്ടുപലക നോക്കി ചൂണ്ടുവിരല്‍ മൂക്കത്ത് വെച്ച് വാപൊളിച്ചു പോകാറുണ്ട്.
പാലാപ്പീ‍സ് തപ്പിപ്പോയാല്‍ കുറച്ചപ്പുറം ഇങ്ങനെയൊരു ബോറ്ഡ് കണ്ട് ഞെട്ടിവിറക്കും!! (ഈ പുലിബോര്‍ഡ് വീണ്ടും പോസ്റ്റുന്നു)

സിനിമാകൊട്ടക v/s സിനിമാതീയേറ്റര്‍ & മാര്‍‌ജാരന്‍സ്!!

2008-05-06T21:10:00.000+04:00

എന്റെ വീടിന്റെ അടുക്കളയില്‍ നിന്നുള്ള ദൃശ്യം. മതിലിനപ്പുറം സരോജ് സിനിമാകൊട്ടകയാണ്. മതിലില്‍ വിശ്രമിക്കുന്ന മാര്‍ജാരന്‍സ്. ക്ലോസ് ഷോട്ട്!
മാര്‍ജാരന്‍സ് + സിനിമാകൊട്ടക ലോംഗ് ഷോട്ട്!
മാര്‍ജാരന്‍സ് വിശ്രമിക്കുന്നത് സിനിമാകൊട്ടകയില്‍ വല്ലപ്പോഴും ഓടുന്ന പടങ്ങളിലെ പാട്ടുകള്‍ കേട്ട്. മിഡ് ഷോട്ട്!
പണ്ട് മലപ്പുറം ജില്ലേലെ നെലമ്പൂര്‍ തറവാട്ടുപുരയിലെ കുട്ടിക്കാലത്ത് മതിലനപ്പുറത്തെ മുസ്ലീം പള്ളിയിലെ 5 നേരം വാങ്കുവിളി കേട്ടായിരുന്നു കഴിഞ്ഞതെങ്കില്‍; ഇവിടെ കോഴിക്കോട്ടെ കോര്‍പ്പറേഷന്‍ അതിര്‍ത്തീല് 3 നേരം സിനിമാ ശബ്‌ദരേഖ കേട്ടാണ് ഞാനും വീട്ടുകാരും കഴിയുന്നത്! (3 നേരം ഷോ കളിക്കുന്നത് മിനിമം 10 ആളെങ്കിലും കൊട്ടകേല് കേറിയാല്‍ മാത്രം! 2 ദിവസം കൂടുമ്പോള്‍ പഴേ തമിഴ് പടം മാറിവരും ഇക്കൊട്ടകേല്. ആളില്ലാഞ്ഞിട്ട് ഇന്ന് ഷോ ഇല്ല) സൂം ഷോട്ട്!
അത് അവിടെത്തെ കഥ. ഇതാ ഇവിടെ സിറ്റീല് ഒരു തീയേറ്റര്‍. ടിക്കറ്റ് കിട്ടാനേയില്ല. ഹൌസ്‌ഫുള്‍! മുപ്പതുകൊല്ലം ആയിട്ടും ‘അണ്ണനും‘ ‘തമ്പിയും‘ കളിക്കളം വിടാതെ കൊച്ചുസുന്ദരികളുമായി അടിച്ചുപൊളിച്ച് ഡപ്പാം‌കുത്തും കളിച്ച് തിയ്യേറ്ററില്‍ ആളെക്കൂട്ടുന്നു! ഹല്ലപ്പിന്നെ! സൂം ഇന്‍ ഷോട്ട്!

കോവൂര്‍ ലൈബ്രറി കമ്പ്യൂട്ടര്‍‌വല്‍ക്കരിച്ചു, ഇന്റര്‍‌നെറ്റും കിട്ടി.

2008-05-04T11:14:00.000+04:00

ഇന്ന് കാലത്ത് പത്തര മണിക്ക് കോഴിക്കോട് കോവൂര്‍ ലൈബ്രറി കമ്പ്യൂട്ടര്‍‌വല്‍ക്കരിക്കുകയും ഇന്റെര്‍‌നെറ്റ് സൌകര്യം ഏര്‍പ്പെടുത്തുകയും ചെയ്തു. ബൂലോഗത്തിന് പ്രതിനിധീകരിച്ചുകൊണ്ട് ആരോരുമറിയാതെ ഞാനും ചടങ്ങില്‍ പങ്കെടുത്തു.

പതീനായിരത്തോളം പുസ്തകങ്ങളും പതിനഞ്ചോളം ആനുകാലികങ്ങളും പതിനൊന്ന് ദിനപത്രങ്ങളും അഞ്ഞൂറോളം മെമ്പറന്മാരുമുള്ള മുപ്പത് വര്‍ഷത്തിലധികം പാരമ്പര്യമുള്ള കോവൂര്‍ ലൈബ്രറിയില്‍ ഇന്നാണ് ഐടി യുഗം പടികയറിയെത്തുന്നത്!

ബൂലോഗത്തെക്കുറിച്ച് അതിന്റെ ഭാരവാഹികളോടെങ്കിലും വിവരിച്ചുകൊടുക്കാനും അറിയാവുന്നവിധം മനസ്സിലാക്കിക്കൊടുക്കാനും ഞാന്‍ ഭഗീരഥപ്രയക്നം ചെയ്തു. അവരെന്നോട് പറ്റുമെങ്കില്‍ സദസ്യര്‍ക്ക് പറഞ്ഞുകൊടുക്കാന്‍ സൌമനസ്യം കാണിച്ചെങ്കിലും വിശിഷ്‌ട വ്യകതികളുടെ പ്രഭാഷണപരമ്പരയ്ക്ക് കളങ്കമാവുമോ, സമയം അതിക്രമിച്ചെങ്കിലോ എന്നാലോചിച്ച് പിന്നീടൊരിക്കല്‍ വേണ്ടപ്പെട്ട ബൂലോഗപ്രതിനിധികളുടെ സാന്നിധ്യത്തില്‍ ആവാമെന്ന് ഉറപ്പുനല്‍കി പോരുകയായിരുന്നു ചെയ്തത്.

കമ്പ്യൂട്ടര്‍ ഉല്‍ഘാടനം (കമ്പ്യൂട്ടര്‍ തല്‍ക്കാലമില്ലാതെ!) ശ്രീ ബാലന്‍ മാസ്റ്ററും ഇന്റെര്‍നെറ്റ് ഉല്‍ഘാടനം (വളരെ നല്ല പ്രസംഗത്തിലൂടെ) ബഹു. ഡെപ്യൂട്ടി മേയര്‍ ശ്രീ പി.എ.ലത്തിഫും നിര്‍വഹിച്ചു. ഇന്റെര്‍നെറ്റ് ഒരു ‘നെറ്റ്’ ആണെന്നും അത് വേണ്ടവിധം ഉപയോഗിച്ചാല്‍ ‘നെറ്റി’ല്‍ കുരുങ്ങാതെ ഫലപ്രദമാക്കാമെന്നും ശ്രീ ലത്തീഫ് പറഞ്ഞു. വിരല്‍‌ത്തുമ്പില്‍ എത്തുന്ന വിവരങ്ങളെല്ലാം ആധികാരികതയോ വസ്തുനിഷ്ടമോ എന്ന് കണ്ണടച്ച് വിശ്വസിക്കാനാവില്ലെങ്കിലും നെറ്റിലെ ഏത് വിവരങ്ങള്‍ക്ക് പിന്നിലും ഒരു വ്യക്തിയുടെ സ്വന്തം കാഴ്ചപ്പാടുകളോ സ്വാര്‍ത്ഥതാല്പര്യമോ കാണുമെങ്കിലും അത് കണ്ടറിഞ്ഞ് ഉപയോഗിച്ചാല്‍ കുഴപ്പമില്ലെന്ന് അദ്ധേഹം അറിയിച്ചു.

നാട്ടിന്‍‌‌‌പുറങ്ങളിലെ വായനശാലകളില്‍ ഐടി യുഗം തുടങ്ങുന്നത് നല്ലതുതന്നെ. ബ്ലോഗുകളും അങ്ങിനെ വായനശാലകളിലൂടെ പ്രചുരപ്രചാരം നേടുമാറാകട്ടെ എന്ന് നമുക്ക് പ്രത്യാശിക്കാം അല്ലേ?

N.B:- ഇത് തികച്ചും എന്റെ മാത്രം കാഴ്ചപ്പാടാണ്. ഒരിക്കലും ഒരു ‘അക്കാഡമി’ക്കും ഇക്കാര്യത്തില്‍ ഇപ്പോള്‍ പങ്കില്ല എന്നറിയിച്ചോട്ടെ.

പുസ്തക കച്ചോടം പൊടിപൊടിക്കുന്നു!

2008-05-02T10:09:00.000+04:00

മുത്തശ്ശിക്കും വേണം പുസ്തകം! ബൂലോകത്തിന്നും കാണുന്ന അപൂര്‍വകാഴച.

പമ്മന്‍ പുസ്തകങ്ങളില്‍ പമ്മിനോക്കുന്ന യുവതലമുറകളേയും റെറ്റിനയില്‍ പൊതിഞ്ഞെടുത്തു.

ഓശാരത്തില്‍ ഒരു പുസ്തകം വായിച്ചുതീര്‍ക്കാം ഫ്രീയായിട്ടുതന്നെ!

കോഴിക്കോട്ടെ സെക്കന്റ് ഹാന്‍ഡ് പുസ്തകശാലയിലൊരിടത്തെ കാഴ്ചകള്‍..

കാവില്‍ ദേവിയുണ്ടോ ദേവീ..?

2008-04-26T09:33:00.001+04:00

കണ്ണൂര്‍ ചിറയ്ക്കല്‍ കാവ്

സാലഭഞ്ചിക പ്രതിമ (പത്മനാഭപുരം കൊട്ടാരത്തൂണിലെ..)

നിലമ്പൂര്‍ കോവിലകം കടവിലെ ആല്‍‌മരം. (പഴയ ഫോട്ടോ മങ്ങിപോയതില്‍ ക്ഷമിക്കൂ)

ഈ മൂന്ന് പടങ്ങളും ചേരും‌പടിചേരില്ലേ?

റെറ്റിനോപൊതിയ്ക്ക് ഒരു വയസ്സായ്.

2008-04-17T08:15:00.000+04:00

റെറ്റിനോപൊതിയ്ക്ക് ഇന്ന് ഒന്നാം പിറന്നാളാണ്. കഴിഞ്ഞകൊല്ലം ഇതേദിവസം മണിമുഴങ്ങുന്നതാര്‍ക്ക്‌ വേണ്ടി? എന്നൊരു ഫോട്ടോപോസ്റ്റോടെ തുടക്കമിട്ട ഈ ബ്ലോഗിനെ ഇത്രേം കാലം പ്രോത്സാഹിപ്പിച്ച ഏവര്‍ക്കും എന്റെ കൂപ്പുകൈ.

അവധിക്കാലം ഹാര്‍പ്പോയ് ഹോയ്..!

2008-04-06T22:04:00.000+04:00

ഇതൊരു പള്ളിക്കൂടം. ആരെങ്കിലും ഉണ്ടോയെന്ന് നോക്കാം.

ജാനാല തുറന്നിട്ടിരിക്കുന്നല്ലോ, അകത്താരെങ്കിലും കാണുമായിരിക്കും.

ഹായ്, ദേ.. ഒത്തിരി കുരുന്നു നിഷ്‌കളങ്കബാല്യത്തിന്‍ പ്രതിനിധികള്‍!

ഹെഹേയ്, ച് ചീ, ലൈന്‍ ലൈനായി നട നട, ക്വാക്ക്, ക്വാക്ക് ക്വാക്ക് (ബാക്ക്) ...

(മൂന്നാറിലെ മിലിറ്ററിചിട്ടയില്‍ പോകുന്ന ‘ചിന്ന‘ആര്‍മിയും ‘പെരിയ‘കമാന്‍‌റ്ററും.)

പോയ കിനാവിലെ.. എന്ത് സംഭവിച്ചു??

2008-04-03T09:47:00.000+04:00

പോയ കിനാവിലെ രാവിലെ ഞാന്‍ ഷേയ്‌വ് തുടങ്ങിയതായിരുന്നു...

സമീപം ഏഷ്യാനെറ്റ് റേഡിയോ ശബ്‌ദതൊഴിലാളിയും സുഹൃത്തും ആയ റെജി മണ്ണേല്‍ തപസ്സിലായിരുന്നു. അത് കൊളമാക്കാന്‍ ഞാന്‍ ഒരു രാഗം ആലപിച്ചെങ്കിലും...

തപസ്സിളക്കാന്‍ കഴിഞ്ഞില്ല. ഞാന്‍ ചമ്മിപ്പോയി.

അക്കാര്യം വിളമ്പാന്‍ സുഹൃത്തുക്കളൊത്ത് കത്തി വെക്കുന്ന നേരം, അത് സംഭവിച്ചു. ഞാന്‍ ഞെട്ടിത്തിരിഞ്ഞു നോക്കി!

അയ്യോ.. ഓടിവരണേ.. ഷുക്കൂറേ, ജബ്ബാറേ, പാമൂ, നീരൂ.. ഓടിവാ മക്കളേ..!

പടച്ചോനേ, എന്തായീ കാണുന്നേ റബ്ബേ?

ആ കെടപ്പ് കെടക്കുന്നത് കണ്ടോ, എനിക്ക് വെയ്യായേ!

ഇനി നമ്മളെന്താ ചെയ്യാ, ആരെങ്കിലും വരുന്നേനും മുന്‍പ് വേം മുങ്ങാം. ഒരു കൊലക്കേസ്സ് താങ്ങാന്‍ വെയ്യാ..!

പാട്ടുപെട്ടി അഥവാ ഗ്രാമഫോണ്‍

2008-03-26T21:46:00.000+04:00

ഇവനാണ് പാട്ടുപെട്ടി അഥവാ ഗ്രാമഫോണ്‍. ഒരുകാലത്ത് കോഴിക്കോട്ടെ പെരുമനിറഞ്ഞ സംഗീതസദസ്സുകളില്‍ നിറഞ്ഞുനിന്ന സാന്നിധ്യം, ഇന്നിവന്‍ വെറുമൊരു കാഴ്‌ചവസ്തു മാത്രം. ഐപോഡിനും സീഡി പ്ലയറിനും വഴിമാറി കൊടുത്ത അവരുടെയൊക്കെ ഉപ്പൂപ്പ!
ഇതും പാട്ടുപെട്ടി

‘പാട്ടുപെട്ടികള്‍ വാങ്ങുവാനാരും വരുന്നില്ലേ പടച്ചോനേ!‘- വില്‍‌പനക്കാരന്‍ കല്ലായിക്കാരന്‍ മുഹമ്മദ്‌കോയ പെരുവഴിയില്‍ കണ്ണും നട്ട്...

ചിത്രകാരന്‍ ദേ ഇങ്ങനെ ഇരിക്കും!!

2008-03-24T14:57:00.000+04:00

സദസ്സിലെ ഭാവി ബൂലോഗര്‍

കണ്ണൂരാന്‍’സ് ബൂലോഗവിവരണം കെ.പി.സുകുമാരന്‍ അഞ്ചരക്കണ്ടി നോക്കിനില്‍ക്കുന്നു, ഒപ്പം സദസ്സും...

ശില്‍‌പശാലയിലെ ആദ്യബ്ലോഗന്‍ ശ്രീ പ്രദീപ് കുമാറിന് ടിപ്സ് കൊടുക്കുന്ന കണ്ണൂരാനും അത് കണ്ട് അടുത്ത ബ്ലോഗ് നിര്‍മ്മിക്കാനുള്ള ഊറ്റത്തോടെ ഉഷടീച്ചറും കൂട്ടരും...

ഉഷടീച്ചറുടെ ബ്ലോഗും റെഡി. കണ്ണൂരാന്‍ മാഷിന്റെ റോളില്‍ സമീപം...

കണ്ണൂരാന്‍ അറ്റ് ക്ലാസ്സ്..

കെ.പി.സുകുമാരന്‍ അഞ്ചരക്കണ്ടി അറ്റ് ക്ലാസ്സ്

നാസര്‍ കൂടാളി അറ്റ് ബെഞ്ച് & ഡെസ്ക്...

ചിത്രകാരന്‍ ദേ ഇങ്ങനെ ഇരിക്കും!! (99% ആ ചാക്ക് മാറ്റിയാല്‍ കാണാം..)

പുലി നിരോധിത മല!!

2008-03-18T10:17:00.000+04:00

കോഴിക്കോട്‌ ഇങ്ങനെയൊരു മലയുണ്ട്‌. മെഡിക്കല്‍ കോളേജ്‌ കോമ്പൗണ്ടിലാണത്‌!
ദേ കണ്ടില്ലേ..

ഏതോ രസികന്റെ ഭാവനാവിലാസം വിളയാടിയപ്പോള്‍ ഈ ബോര്‍ഡിലെ 'പുകവലി നിരോധിത മേഖല' ഇപ്പടിയായി തീര്‍ന്നു!
മലയാളി എന്നും എവിടേയും രസികാളി തന്നെ എന്നതില്‍ നോ ഡൗട്ട്‌!

നാട്ടില്‍ പലയിടത്തും പുലി ഇറങ്ങുന്ന കാലമായത്‌ കൊണ്ടാവാം.. ഇന്നത്തെ പത്രത്തിലും ഉണ്ട്‌ ഒരു പുലി!

(വയനാട്ടിലെ പുലിഫോട്ടോയ്‌ക്ക്‌ കടപ്പാട്‌: മാതൃഭൂമി സൈറ്റ്‌)

മൂന്നാറിന്‍ പൂക്കള്‍, കായ്‌കള്‍.

2008-03-17T13:19:00.000+04:00

വാനരമുഖ പൂവ് (ശരിപ്പേര്‍ തെരിയാത്..)

തീ പൂവ് (യഥാര്‍ത്ഥനാമം അനന്തം അക്‌‌ഞാതം..)

വേലി പൂവ് (തോട്ടത്തിന്റെ വേലിയിലാണിത് കണ്ടത്!)

അന്തൂറിയം തന്നെ! (നോ ഡൗട്ട്)

ഈ കായ്/ഫലം/പഴവര്‍ഗം എന്തെന്നറിയാന്‍ ഞാനും കൂട്ടരും കടിച്ചു നോക്കി, രുചിച്ചു നോക്കി
ഒടുവില്‍ ഒരു നിഗമനത്തില്‍ എത്തി. ഇവന്‍/ഇവള്‍/ഇത് 'പ്ലം' കുടുംബത്തില്‍ പെട്ടത് തന്നെ!

യുവതിയുടെ ഒരു കാല്‍ കിടക്കുന്നു!

2008-03-15T22:29:00.000+04:00

ദേ കണ്ടോ! വിദേശവനിതയുടേതാണെന്നോ, തെറ്റിദ്ധരിക്കാതെ..!

ഉടന്‍ തെളിയും, ധൃതി വേണ്ട എന്തെന്നത് ഇപ്പോളറിയാന്നേ..

അയ്യേ.. ഇതായിരുന്നോ!
മൂന്നാറിലെ ഒരു ബോണ്‍സായ് ചെമ്പകത്തൈ ആണോ! അല്ലേ? എനി‍ക്കറിയത്തില്ല...
അറിയാവുന്നവര്‍ പറയുമെന്ന് കരുതട്ടെ...

ചില മൂന്നാര്‍ കാഴ്‌ചകള്‍..

2008-03-06T16:00:00.001+04:00

പുഴയൊഴുകും വഴി...

മലകള്‍.. പുഴകള്‍..
ഭൂമിയ്ക്ക് കിട്ടിയ സ്ത്രീധനങ്ങള്‍...

മൂന്നാര്‍ താഴ്വരയില്‍ മേയും പശുക്കള്‍..

ഞങ്ങള്‍ക്കെന്താ മൂന്നാറില്‍ ഹണിമൂണാഘോഷിച്ചാല്‍?

മൂന്നാറിലെ ഒരു ആറ്..

ക്ലാസ്‌മേറ്റ്‌സ്‌ ഒന്നിച്ചനേരം...

2008-02-11T13:52:00.000+04:00

ജനുവരി ഒരു ഓര്‍മയായി, മറയ്‌ക്കാന്‍ പറ്റാത്ത ഒരു ഓര്‍മ. പതിനേഴു വര്‍ഷങ്ങള്‍ക്ക്‌ മുന്‍പ്‌ പടിയിറങ്ങിപോയതിനു ശേഷം വീണ്ടും കലാലയവാതില്‍ കടന്ന്‌ ഞങ്ങള്‍ - ക്ലാസ്‌മേറ്റ്‌സ്‌ - ഒരുമിച്ചു കൂടിയത്‌ ജനുവരി ഒടുവിലെ ശനിയാഴ്‌ചയായിരുന്നു. നിലമ്പൂരിനടുത്ത്‌ മമ്പാട്‌ എംഇഎസ്‌ കോളേജ്‌ വലിയ മാറ്റങ്ങളില്ലാതെ അതേപടി നിലകൊള്ളുന്നു.
ഒരുമിച്ച്‌ പഠിച്ചിരുന്ന പ്രിയംവദ (കലാതിലകം ലഭിച്ച പാട്ടുകാരിയും നര്‍ത്തകിയും), ജയന്തി (കുഞ്ഞുമൊത്ത്‌), ഷംല, റുക്‌സാന, സാബു, പ്രശാന്ത്‌, ഷഫീക്‌, യൂനസ്‌, നസീര്‍, ഗായകന്‍ സജീര്‍ എന്നിവരും ആര്‍ട്‌സ്‌ സെക്രട്ടറി ആയിരുന്ന സക്കീര്‍ഹുസൈന്‍ (ഈസ്‌റ്റേണ്‍ കറിമസാല നടത്തുന്നു), പണ്ടെന്നോ പഠിച്ചിരുന്ന പീവീ അബ്‌ദുല്‍ വഹാബ്‌ എംപി... തുടങ്ങി പലരും സന്നിഹിതരായിരുന്നു.

വീണ്ടും കാണുമ്പോള്‍ ഞങ്ങള്‍ക്ക്‌ സൗഹൃദം എവിടെ കോമ ഇട്ടുനിറുത്തിയോ അവിടം തൊട്ട്‌ തുടരാന്‍ വലിയ ബുദ്ധിമുട്ടൊന്നും തോന്നിയില്ല. പതിനേഴ്‌ വര്‍ഷങ്ങള്‍ പോയതറിയാതെ, അത്രയും നീണ്ട ഇടവേള തോന്നിപ്പിക്കാതെ, ചില്ലറമാറ്റങ്ങള്‍ വന്ന കാമ്പസ്സിലൂടെ ഇത്തിരിമാറ്റങ്ങള്‍ വന്ന ഞങ്ങള്‍ കളിചിരിതമാശകള്‍ പറഞ്ഞങ്ങനെ നടന്നു.

പഴയ ക്യാന്‍റ്റീന്‍ കെട്ടിടം കാടുപിടിച്ച്‌ കിടക്കുന്നുണ്ട്‌. അവിടെയെത്തിയപ്പോള്‍ ഞങ്ങളില്‍ പലരും നെടുവീര്‍പ്പിട്ടു. പരിപ്പുവടയും, പഴംപൊരിയും, ബോണ്ടയും ചായകാപ്പിയും ഒരു നിമിഷം അകതാരിലോടിയെത്തി.

ഒപ്പമുള്ള നസീറാണ്‌ പ്രിയംവദയോട്‌ ഒരു കാര്യം പറഞ്ഞത്‌. ഞാന്‍ ബ്ലോഗര്‍ ആണെന്നും അവളും എന്റെ കഥയില്‍ നായികയായെന്നും ഒക്കെ..http://eranadanpeople.blogspot.com/2007/08/blog-post_19.html ; അവള്‍ ഞെട്ടി വാപൊളിച്ചു. എടാ കൊച്ചുകള്ളാ എന്ന ചോദ്യഭാവത്തില്‍ നില്‍ക്കുന്ന പ്രിയംവദയെ നോക്കി ഞാനൊരു കള്ളച്ചിരിയോടെ നിന്നു.
പണ്ടെന്നും നടന്നിരുന്ന കോളേജ്‌ വരാന്തയിലൂടെ പിന്നീട്‌ ക്ലാസ്‌മേറ്റ്‌സ്‌ അലസഗമനം ചെയ്‌തു. പഠിച്ചിരുന്ന ക്ലാസ്‌ മുറിയുടെ ചാരിയിട്ടിരുന്ന വാതില്‍ തുറന്ന്‌ എല്ലാവരും അകത്ത്‌ പ്രവേശിച്ചു. പറഞ്ഞറിയിക്കാന്‍ കഴിയാത്ത ഒരനുഭൂതി. തലയില്‍ വിദ്യുത്‌തരംഗസ്ഫുലിംഗം, പതിനേഴ്‌ വര്‍ഷം പിന്നോട്ട്‌ പോയി വിണ്ടും ചെന്നെത്തിയപോലെ.. അതേ ബെഞ്ചും ഡസ്‌കും..
പണ്ട്‌, ഇരുന്നിരുന്ന അതേ ബെഞ്ചിലതേയിടത്ത്‌ വിണ്ടുമിരുന്നു. ബോര്‍ഡില്‍ കുത്തിക്കുറിക്കാനൊരു പൂതി. താഴെ കിടന്ന ചോക്കെടുത്ത്‌ വിണ്ടും പലതും കുത്തിക്കുറിച്ചിട്ടു.
അന്നില്ലാതിരുന്ന പുതുതായി പണികഴിപ്പിച്ച ഓഡിറ്റോറിയത്തില്‍ എല്ലാവരും ഒത്തുകൂടി. ഗാനമേളയും മിമിക്രിയും മോണോ ആക്‍ടും ഒക്കെയായി വൈകുവോളം ക്ലാസ്‌മേറ്റ്‌സ്‌ കാമ്പസില്‍ ചിലവഴിച്ചു. പ്രിയംവദ ഒത്തിരി പാട്ടുകള്‍ കാതില്‍ തേന്‍മഴയായ്‌ ആലപിച്ചു. ഒപ്പം ഗായകന്‍ സജീറും ഒരുപിടി കിഷോര്‍ ഹിറ്റ്‌സ്‌ പാടി.

ബൂലോഗരേ, നവവല്‍സരാശംസകള്‍...

2007-12-31T12:20:00.000+04:00

ഇക്കൊല്ലത്തെ ഒടുക്കത്തെ കാറ്റ്...

പോയ് വരൂ ദിനകരാ നല്ലൊരു ഉദയത്തിനായ്...

കണ്ണെത്താദൂരേ മറുതീരം, മറുതീരത്തേ കോണില്‍ സംഗമം...

വള്ളം തുഴഞ്ഞക്കരെ പോകാം...

നാളെവരുമ്പോള്‍...

നവമുത്തുകളുമായെത്താം...

ചിത്രങ്ങളെ കൊണ്ടൊരു അവിയല്‍!

2007-12-21T17:11:00.000+04:00

മഴയില്‍ പൊലിഞ്ഞൊരു പഴുത്തില!

വെയില്‍ കായുന്നൊരു മല്‍സ്യകന്യക; അരികില്‍ രചിച്ചുവെച്ചൊരു കവിതാപോസ്റ്റും (കടലാസ്സില്‍)..

പണ്ടത്തെ അടുപ്പും കുടുക്കയും...

തീവണ്ടിയിലെ തിരക്കിനിടയിലൊരു 'അനോണി'യുടെ മയക്കം..

കടത്തുബോട്ട് (ഫോര്‍‌ട്ട് കൊച്ചിയില്‍)

എരുമക്കൂട്ടം കോഴിക്കോട്ടങ്ങാടീല്‌ പണിമുടക്കി!

2007-11-02T20:59:00.000+04:00

സായംസന്ധ്യകളിലെന്നും കോഴിക്കോട്ടങ്ങാടിയിലെ തിരക്കേറിയ മാവൂര്‍ റോഡും പാളയം മാര്‍ക്കറ്റും ഒന്നടങ്കം കൈയ്യേറികൊണ്ട്‌ കൂസലില്ലാതെ, അത്രേം നേരം കിട്ടിയ ചപ്പുചവറുകള്‍ ചവച്ചരച്ചുകൊണ്ട്‌ മന്ദം മന്ദം പട്ടാളചിട്ടയില്‍ ലെഫ്‌റ്റ്‌റൈറ്റടിച്ച്‌ നീങ്ങുന്ന കരുമാടിക്കൂട്ടം മറ്റാരുമല്ല - എരുമക്കൂട്ടം തന്നെ!

വഴിയില്‍ ബസ്സ്‌ കാത്തുനില്‍ക്കുന്നോരും പോണോരും വാഹനവ്യൂഹവും എന്തിന്‌; കാക്കികളും ട്രാഫിക്കന്മാരുമൊക്കെ കരുമാടിക്കൂട്ടത്തെ കണ്ടാല്‍ വഴിമാറിക്കോളണം, 'ആഹാ, എന്നാ കാണാല്ലോ' എന്ന ഭാവത്തിലൊന്നും മുന്നീനില്‍ക്കാന്‍ നോക്കേണ്ട, യമരാജന്റെ അരുമവാഹനമായ എരുമക്കൂട്ടം വഴിമാറ്റിച്ചോളും! (ഇല്ലേല്‍ കാലില്‍ ആവിയുള്ള അപ്പിയിട്ടത്‌ മാത്രം ഓര്‍മ്മയുണ്ടാവും എന്ന ഭീഷണിയും)

എത്ര ചീറിപ്പായും വാഹനങ്ങളുണ്ടേലും വീഥിയില്‍ നടുക്കെങ്കില്‍ ഒത്തനടുക്കുതന്നെ കരുമാടിയെരുമക്കൂട്ടം ഏമ്പക്കമിട്ടിരുന്നോളും, ഗതകാലസ്മരണകള്‍ ഓരോന്നായിട്ട്‌ അയവിറക്കികൊണ്ടവ നേരം വെളുപ്പിച്ചോളും. കൊല്ലങ്ങളായുള്ള ചര്യ നമ്മളായിട്ടെന്തിനാ ഇല്ലാതാക്കുന്നതല്ലേ?

ഒന്നാലോചിച്ചാല്‍ ഇവരൊക്കെ എത്രയോ ഭേതം! തൊട്ടതിനും തട്ടിയതിനും മുട്ടിയതിനും കണ്ണുരുട്ടിയതിനുമെല്ലാം റോഡുപരോധവും ഹര്‍ത്താലും പണിമുടക്കും നടത്തുന്ന നമ്മള്‍ ഗോഡ്‌സ്‌ ഓണ്‍ കണ്‍ട്രീസിനേക്കാളും 'നീറ്റ്‌'അല്ലേ മിണ്ടാന്‍ വയ്യാത്തയിവ! അതെന്നോ എരുമകള്‌ മനസ്സിലാക്കിയിരിക്കുന്നു എന്നതുപോലും നേതാക്കള്‍ മനസ്സിലാക്കിയില്ലാലോ. :(

"നിങ്ങള്‍ക്കൊന്നും പെരേം കുടീം ഉടമേം ഒന്നൂല്ലേ എരുമകളേ?" - എന്നൊരു വട്ടന്‍ ചീറ്റികൊണ്ടാരാഞ്ഞപ്പോള്‍ ഉത്തരമെന്നപോലെ അവ ഒന്നടങ്കം:

"അമ്പേ.. ബേ. മ്പേ..," എന്നു മുദ്രാവാക്യമുതിര്‍ത്ത്‌ ചാണകമിട്ടുകൊണ്ട്‌ റോഡില്‍ കുത്തിയിരുപ്പ്‌ തുടര്‍ന്നു..

(ബ്ലോഗുലകത്തിനുവേണ്ടി കോഴിക്കോട്ടങ്ങാടിയില്‍ നിന്നും ഏറനാടന്‍)

ഏറനാടന്‍ ചരിതങ്ങളില്‍ പറഞ്ഞിട്ടുള്ള നാട്ടിലൂടെ...

2007-10-29T22:13:00.000+04:00

ഏറനാടന്‍ ചരിതങ്ങള്‍ ഉറങ്ങിക്കിടക്കുന്ന മണ്ണിലേക്ക്‌ എത്തുന്നതിനു മുന്നെയുള്ള പ്രസിദ്ധമായ നിലമ്പൂര്‍ തേക്കിന്‍കാട്‌..

ചരിതങ്ങളില്‍ പലപ്പോഴായി വന്നിട്ടുള്ള ചാലിയാര്‍ പുഴ..

ചിങ്കക്കല്ല് വെള്ളച്ചാട്ടം - ആനകള്‍ വെള്ളം കുടിക്കാന്‍ വരാറുണ്ടിവിടെ..

കാട്ടിലൊരു നീരാട്ട്‌ - ഏത്‌ നക്ഷത്രഹോട്ടലിലുണ്ട്‌ ഈ സുഖനീരാട്ട്‌?

മഴ വരുന്നു കിഴക്കന്‍ മലയുടെ താഴ്‌വാരത്തിലൂടെ...

മഴ വന്നേയ്‌..ഓടിക്കോ..!

മധുരിക്കും ഓര്‍മ്മകളേ.. മലര്‍മഞ്ചല്‍ കൊണ്ടുവരൂ...

2007-08-12T12:16:00.000+04:00

ഞാന്‍ പഠിച്ചിരുന്ന പള്ളിക്കൂടം - ചെട്ടിയങ്ങാടീലെ കല്ലായിസ്‌ക്കൂള്‌.

ആമിന്താത്ത - എന്നെ ചെറുപ്പം തൊട്ട്‌ ഒരുവിധം വലുപ്പം വെക്കുന്നതുവരെ പരിപാലിച്ചിരുന്നു(വര്‍ഷങ്ങളോളം പുരയില്‍ വേലയെടുത്ത്‌ വസിച്ചിരുന്നു)

ബായക്കൊല! (കണ്ടപ്പം ഒരു പൂതി).

ഇതാണാട്‌ - നാടനാട്‌ Or കൊറ്റനാട്‌

(മുന്‍കൂര്‍ ജാമ്യം:- ഇപ്പടങ്ങള്‍ എടുത്തത്‌ സഹോദരനാണ്‌)

അടി-ക്കുറിപ്പ്‌ ഇടാമോ?

2007-07-23T08:53:00.000+04:00

'മണല്‍ക്കാറ്റ്‌' സീരിയല്‍ പ്രിവ്യൂ ചടങ്ങില്‍ ഹാജറായ എമറാത്തിലെ ബൂലോഗരാജര്‍ ശ്രീമാന്മാര്‍ അഗ്രജന്‍, കൈതമുള്ള്‌, പട്ടേരി പിന്നെ... കണ്ണട വെച്ചത്‌ ആരെന്നറിയാമെങ്കില്‍ പറയാമോ?

ഇവിടെയിതാ മറ്റൊരു ഗ്രൂപ്പ്‌?! ഇത്തിരിവെട്ടം, മിന്നാമിനുങ്ങ്‌, സൈഫി - ഇനിയെന്ത്‌ മൊഴി വേണമെന്ന ചര്‍ച്ചയാണോ? ആ!

പഴയ സ്‌നേഹിതന്മാര്‍ ഏറെക്കാലത്തിനൊടുവില്‍ കണ്ടുമുട്ടിയ അനര്‍ഘനിമിഷം - ശ്രീ കൈതമുള്ളും കേപീകേ വെങ്ങരയും!

കുറുമാന്‍ പാപ്പരാസികളെ വെട്ടിച്ച്‌ മുങ്ങിക്കളഞ്ഞുവെന്ന വാര്‍ത്ത കിടലമുളവാക്കി. പടം പിടിക്കാനായില്ല.

മ്യൂസിയം വളപ്പിലെ പകര്‍പ്പ്‌!

2007-05-27T13:24:00.000+04:00

കൂട്ടുകാര്‍ രണ്ടുപേര്‍
വഴിതെറ്റിയെത്തി
ഈ മ്യൂസിയം വളപ്പില്‍..
അന്തം വിട്ടു പന്തം കണ്ടതുപോല്‍
നിന്നുപോയ്‌ വലിയ വാതില്‍ക്കല്‍!
ചുറ്റുമവരെ ശ്രദ്ധിക്കാതെ യുവമിഥുനങ്ങള്‍
അവരുടെ നേരമ്പോക്ക്‌ സരസവര്‍ത്തമാനത്തിലും..

പകച്ചുപോയ കുട്ടികള്‍ രണ്ടും
ഒന്നൂടെ പകച്ചതോ
ഈ പീരങ്കി കണ്ടപ്പോളാണോ?

അവര്‍ക്കറിയില്ലാ ഈ പീരങ്കി
ചത്തിട്ടൊരുപാട്‌ കാലമായെന്നത്‌..

ചാലിയാര്‍ പുഴ പിന്നേയുമൊഴുകീ...

2007-05-14T13:18:00.000+04:00

ഇപ്പോള്‍ ഈ വേനല്‍കാലത്ത്‌ ചാലിയാര്‍ കളകളസ്വരമുള്ള പാദസരമിട്ട്‌ മെലിഞ്ഞൊഴുകുന്ന ഒരു സുന്ദരിയായിട്ടുണ്ടാവാം.. ചാലിയാറിലെ ഓരോ ഓളത്തിനുമോരോ കഥകള്‍ പറഞ്ഞൊഴുകാനുണ്ടാവാം..

ഈ നാടന്റെ ജന്മനാടായ നിലമ്പൂരിലെ കോവിലകത്തെ കടവിലെ വയസ്സന്‍-ആല്‍മരത്തിനരികില്‍ നിന്നും 'ക്ലിക്കിയ' പടം!

(ഏറനാടന്‍ ചരിതങ്ങളില്‍ തുടരനായിട്ടെഴുതിയ മീന്‍കാരന്‍ അബു

ഭാനുപ്രിയതമ്പ്രാട്ടിയെ രക്ഷിച്ചെടുത്തത്‌

ദേ.. ആ കാണുന്ന കുളിക്കടവില്‍ നിന്നായിരുന്നു...!)

സന്ധ്യാനേരം കടപ്പുറത്തൊരു ബാലന്‍!

2007-05-07T10:16:00.000+04:00

"നേരം മോന്തിയായി മോനേ! വേഗം വീട്ടില്‍ വാ.."

"ഇല്ലമ്മേ.. ഇച്ചിരിനേരം കൂടി കൂട്ടുകാരുടെ കളികണ്ടോട്ടേ.."

"ഇനി പോവാംല്ലേ? സൂര്യനും പോണൂ.. മുഖം ശരിക്കും പതിയോ ഏട്ടാ?"

ചെമ്പകമല്ല, ചെമ്പരത്തിയല്ലാ.. പിന്നെയോ?

2007-05-02T08:32:00.000+04:00

ഈ പൂക്കള്‍ ഏതെന്നറിയാതെ
പിടിച്ചെടുത്തു ഞാനെന്‍ ഫോട്ടോപെട്ടിയില്‍
ഇരിക്കുന്നതങ്ങ്‌ തിരോന്തരം മ്യൂസിയം വളപ്പിലും..

ഇതിന്‍ പേരറിയാമോ പ്രിയകൂട്ടുകാരേ(രികളേ)?
ഒന്നുറപ്പാണിവ സുല്ലിന്‍ ചെമ്പകമല്ലാ
ചെമ്പരത്തിയുമല്ലാ..

ദൂതുപോകും രാജഹംസമേ...

2007-05-01T09:28:00.000+04:00

ഒരു അരയന്നം ഒറ്റപ്പെട്ട്‌ ചിന്താവിഷ്‌ടയായി നീങ്ങുന്നു. ചോദിക്കാന്‍ അവരുടെ ഭാഷ അറിയില്ല. പ്രണയിതാക്കളുടെ ഭാഷാതീതമായ ദൂതുകള്‍ കൊണ്ടുപോകും ഹംസങ്ങള്‍ക്ക്‌ എന്തിനിത്ര പരിഭവം!

(ദോഹാ സൂവില്‍ വെച്ച്‌ പിടിച്ചതീ രംഗം)

ഈ വലയില്‍ വല്ലതും തടയുമോ?

2007-04-29T11:52:00.000+04:00

"കാറ്റും മഴയും വരുന്നു. വലയില്‍ വല്ലതും തടയുമോ? കുഞ്ഞുങ്ങള്‍ പട്ടിണിയാണേയ്‌.."

ആലുവയിലൊരിടത്ത്‌ ഒരോണപാട്ടിന്‍ ഷൂട്ടിംഗിനു പോയപ്പോള്‍, പെരിയാറിന്‍ തീരത്ത്‌ മഴ പെയ്യുമ്പോള്‍ എടുത്ത 'വലവീശല്‍ രംഗം'. (ഖത്തറിലെ 'ഗള്‍ഫ്‌ ടൈംസില്‍' Pic of the Week ആയിവന്നിരുന്നുവിത്‌)

കാറ്റാടിത്തണലും തണലത്തൊരു...

2007-04-25T11:46:00.000+04:00

(2003-ല്‍ ദോഹയില്‍ വസിക്കുന്ന കാലം, കാഴ്‌ചബംഗ്ലാവില്‍ എന്റെ ശ്രദ്ധ ഇതിലുടക്കിനിന്നു!)

ആ ചാമരം ചാചാമരം
ഈ മരത്തിന്‌ നിമിഷനേരം
കണ്ണില്‍ തങ്ങിനില്‍ക്കാന്‍ മേലാ..

മനുഷ്യജന്മം ഒരു സമയത്ത്‌ ഇലപൊഴിഞ്ഞ്‌ ഒറ്റപ്പെട്ട ഉണക്കമരം പോലെയാവും. അതിലൊരു ഇല തളിര്‍ക്കുന്ന, കായ്കനികള്‍ ഉണ്ടാവുന്ന, അവ തേടി പറവകള്‍ വന്നണയുന്ന സുദിനവും ഉണ്ടാവാം. അല്ലേ?

വേളിക്കായലില്‍ ഓളം തള്ളുമ്പോള്‍...

2007-04-22T12:09:00.000+04:00

"വേളിക്കായലില്‍ ഓളം തള്ളുമ്പോള്‍
ഓര്‍ക്കും ഞാനെന്റെ മാരനെ.."

നേരം വെളുത്തുവരും നേരം വേളിക്കായലിന്‍ മുകളിലൂടെ തീവണ്ടി കൂവിപായുമ്പോള്‍ റെറ്റിനയില്‍ പതിഞ്ഞൊരു ചിത്രം..

സുല്ലിനു സ്വന്തമായ തെങ്ങിന്‍ തോപ്പ്‌!

2007-04-19T10:49:00.000+04:00

കോഴിക്കോട്‌ ടു തിരുവനന്തപുരം റൂട്ടില്‌ കണ്ണൂര്‌ എക്‌സ്‌പ്രസ്സില്‌ പോവും നേരം കണ്ണിലുടക്കിയ സുല്ലിന്റെ തെങ്ങിന്‍ തോപ്പ്‌!
സുല്ലില്ലാത്ത നേരം നോക്കി കാമറയില്‍ ഒരു ക്ലിക്ക്‌! തേങ്ങയടക്കം തോപ്പ്‌ കാമറയ്‌ക്കുള്ളിലായ്‌.

സുല്ലേ മാപ്പേ..

ഇവന്‍ ഓന്ത്‌ - ചോര ഊറ്റുന്നൊരു പാവം.

2007-04-18T11:25:00.000+04:00

മണിമുഴങ്ങുന്നതാര്‍ക്ക്‌ വേണ്ടി?

2007-04-17T15:54:00.000+04:00